Hindi zirtirtute kan fuihpawrh lo - MNYF
MNF ṭhalaite chuan thuchhuah siamin, March 28, 2017 zana CSS Hindi zirtirtute'n CM Bangla an luhchilh chungchanga Assembly House-a chief minister Lal Thanhawla thu sawi dan chu mak an tih thu an tarlang a; CSS Hindi zirtirtute chu MNF mite'n an fuihpawrh lo niin an sawi.
MNYF chuan, CSS Hindi zirtirtute thinur leh mangangin Chief Minister Bungalow gate su hawngin bangla tualah pungkhawmin an au rual tih sawiin, "He an thiltih hi MNF ṭhalaite tel vena emaw, fuihpawrhna emaw vanga tih ni âwm taka ngaih theihin CM-in Assembly House-ah a sawi kha mak kan ti hle a ni," an ti.
CSS Hindi teacher-te thil tih chu social media-ah a darh nghal tih sawiin MNYF chuan, thil chinchang hriat chian tuma CM bangla pana kal khawm zingah MNF ṭhalaite an tel a, Congress ṭhalai te, ZNP ṭhalaite leh Zarkawt khawtlang hruaitute pawh an tel tih an sawi a; Assembly House-ah CM-in MNYF president K Vanlalvena leh MNF local council member Francis Lalrammuana te hming chauh a sawi lang chu politics-a intihmualpho tumna a kâwka an ngaih thu an sawi.
MNYF chuan, CSS Hindi zirtirtute'n CM bangla an thleng thei chu Congress sorkara Home department chak lohna leh inthlahdahzia tilang chiangtu niin an sawi a, "Chief Minister office gate mai pawh ni lo, a chenna gate thlenga mipui lungawi lote'n an sut tlang hi India ram history-ah kan la hre ngai lo," an ti a ni.