Asst. professor post ruak 122 a awm

Higher & Technical Education (HTE) minister R Romawia chuan MNF member Dr K Beichhua zawhna chhangin, Mizoram sorkar college 21-ah assistant professor post ruak 122 a awm thu House a hrilh.

R Romawia sawi danin, sorkar college leh institution hrang hrangah part time lecturer 201 rawih mek an ni. Part time lecturer awm dan chu - sorkar college-ah 182, Mizoram Law College-ah panga, Mizoram Hindi Training College-ah pathum, IASE-ah paruk leh Mizoram Polytechnic, Lungleiah panga a ni.

Part time lecturer lak an nih dawnin advertisment chhuah ṭhin a ni a, HTE Secretary kaihhruaina hnuaiah lak an ni

ṭhin. Contract lecturer-te chu MPSC kal­tlanga lak an ni a, hmun ruak a awm chuan MPSC kaltlang vêka dah ngheh ṭhin a ni.

Mizoram sorkar college-ah principal nghet neih sorkarin a duh tih sawiin HTE Minister chuan, "Principal tur lakna atan hian kum 2014-ah advertisment chhuah a ni a, mahse, UGC aṭangin dan siamṭhat deuh hlek a awm vangin kaltlangpui a ni ta lo. Department chuan buaipui ngaite a buaipui mek zel a ni," a ti.

INC member Dr Ngurdingliana zawhna chhangin R Romawia chuan, National Accreditation & Assesment Council (NAAC) Peer Team-te'n Mizoramah college 20 an endik tawh thu tarlangin, "Tun dinhmunah Khawzawl College, Kamalanagar College, Mizoram Law College leh Mizoram Hindi Training College-te endik a la ni lo," a ti a; college la endik lohte chu endik a nih theihna atan hmalak mek a nih thu a sawi.