VC pass-a zángnadawmna pek loh dan tur ngaihtuah a ni lo

Land Revenue & Settlement (LRS) minister R Romawia chuan, V/C pass rama zangnadawmna pek lohna dan siam sorkarin a la ngaihtuah loh thu, INC member RL Pianmawia zawhna chhangin House a hrilh.

R Romawia chuan, VC pass neitute'n zangnadawmna an hmuh theih ṭan hun hriat theih a nih loh thu sawiin, "Mizoram (Land Revenue) Rules, 2017 Rule 47 (4)-in a sawi angin, VC-te'n an huam chhunga house pass an pek theih aṭang hian crops leh building damage bakah, land value atan compensation pek theih a ni. Ram hlutna aṭanga 15% chu sorkarah an chhùn lêt a ngai," a ti.

LRS Minister sawi danin, Mizoram (Land Revenue) Rules, 2017-in a sawi angin, Mizoram (Survey and Settlement Operations) Act, 2013 hnuaia sorkarin a pawm loh khuaahte (un-notified) an khaw huam chhungah, chu khuaa cheng ngeite tan chauh in hmun pass V/C-te'n an pe thei. House pass hi kum 2015-16 chhungin 869 leh kum 2016-17 chhungin 476 pek a ni.

House pass pek dan
District 2015-16 2016-17
Aizawl 698 425
Lunglei 9 Nil
Mamit 138 21
Kolasib 1 Nil
Champhai 9 2
Serchhip 14 28
Total 869 476