Mizoram sorkarin sum a pek loh avangin Vawk suatah zangnadawmna la dawng lo

African Swine Fever (ASF) avanga an vawk suat neitute hnenah zangnadawmna pek tur sorkar laipuiin a pe chhuak tawh a, mahse, Mizoram sorkarin a tum ve tur a la pek chhuah ve loh avangin vawk suat neitute'n zangndawmna an la dawng lo.

ASF lên avangin vawk vulhtu eng emaw zat chuan AH&Vety department hriatpuinain an vawkte an suat a; AH&Vety department-in ASF avanga vawk suatte bakah, ASF vanga vawk thi zawng zawng tan sorkar laipuiah zangnadawmna an dil a, sorkar laipui chuan vawk suat bikah zangnadawmna pek a remti a ni.

Sorkar laipui chuan vawk suat neitute tan zangnadawmna pek tur chu state sorkar nen a zatve (50-50)-a intum sem turin a ruahman a; Mizoram sorkar leh sorkar laipuiin sum an tum tur chu cheng vbc. 5.84 ve ve a ni.

AH&Vety chuan zangnadawmna tur sum budget-ah an neih loh avangin, Planning department-ah budget allocation-a dah turin an ngen a, an ngenna angin budget allocation-ah dah a ni tawh. Planning department chuan Finance department-ah sum mamawh zat an thehlut tawh a, mahse, Finance department-in an la pe chhuak lo.

Thu dawn danin, sorkar laipuiin a tum tur cheng vbc. 5.84 chu tihfel vek tawh a ni a, mahse Mizoram sorkarin a tum ve tur tihfel a nih huna lak chhuah tura tih a ni. Mizoram sorkarin a tum ve tur Finance department-in an pek chhuah veleh vawk suat neitute hnenah zangnadawmna chu sem tura tih a ni.

Tarlan tawh angin, ASF vanga vawk suat neitute hnena zangnadawmna pek tur first instalment Rs 5,84,97,000 chu March 22, 2022 khan Ministry of Fisheries, Animal Husbandry & Dairying chuan Mizoram sorkarah a rawn pe tawh a, mahse, tun thlengin vawk thi neitute hnenah pek a la ni lo.

AH&Vety minister Dr K Beichhua sawi danin, vawk 10,910 suat neitute tan sorkar laipuiah zângnadawmna Rs 11,69,94,414 an dil a, chuta ṭanga first instalment Rs 5,84,97,000 chu March 22, 2022 khan sorkar laipuiin Mizoram sorkar a rawn pe a ni.

Thu dawn danin, zangnadawmna pek turte chu nikum lama vawk suat tawhte a ni a, zangnadawmna hmuh tâk dil a nih laiin ASF vangin Mizoramah vawk 33,417 a thi a, chu'ng zinga 10,910 chu suat a ni. Kumin bikah June 14, nimin thleng khan ASF lênna hmunah vawk 3,910 leh ASF lênna hmun tih finfiah lohah vawk 256 suat a ni tawh bawk.