Tumruhna nen harsatnate Paltlang theih a ni - CM

St. Paul's Higher Secondary School chuan nimin khan Paulians' Proficiency Award 2022 an sem a, an hun hmanpuitu chief minister Zoramthanga chuan, tumruhna nen harsatnate paltlang theih a ni thu a sawi.

Chief Minister chuan, zirlai hlawhtlinna changte a lawmpui thu sawiin, an hlawhtlinna chu a bul ṭanna a ni tih hria a, hlawhtlinna tam zawk an neih belh zel theih nan tumruhna leh taimakna nen bei zui zel turin a chah. Ṭhalaite tan thlêmna, a bikin ruih theih thil lama thlêmna laka fihlim a pawimawh thu sawiin, "Hlawhtlinna kawngah harsatna hrang hrang a awm ṭhin, tumruhna nen a paltlang theih a ni," a ti.

St. Pauls HSS principal Brother PK James chuan, Paulians' Proficiency Award chu hripui léng avanga kum hnih chhung sem theih a nih loh avangin nimina an semnaah hian kum 2019-20 leh 2020-21 batch-te hlan tel nghal a ni tih a sawi.

Paulians' Proficiency Award hi HSLC leh HSSLC-a St. Pauls HSS aṭanga zirlai ti ṭha (rank holder leh subject topper)-te hnenah hlan ṭhin a ni.