World Blood Donor Day 2022-ah Thisen pe ṭhate chawimawi an ni

Nimin kha World Blood Donor Day a ni a, thupui chu 'Donating blood is an act of solidarity, join the effort and save lives' tih a ni. Mizoram hmun hrang hrangah hman niin, thisen pe ṭhate chawimawina hlan an ni.

Aizawlah chuan MSACS, Association for Voluntary Blood Donation (AVBD) leh State Blood Cell huaihawtin Aijal Club-ah hman a ni a, Health minister Dr R Lalthangliana'n a hmanpui. R Lalthangliana chuan, mihring dam chhungah mi dang tana inpekna tluka hlu leh ropui a awm lo tih a sawi.

Dr R Lalthangliana chuan, Pathianin Mizote thinlungah mahni mihringpuite hma­ngaih­na, mi dangte lainatna leh duh­sakna a dah tih sawiin, "Chumi lan chhuahna pawimawh berte zinga mi chu mamawhtute tana a thlâwna thisen pek hi a ni," a ti.

Health Minister chuan, mahni tana hlâwkna ûm loa damlo mangangte tana an din tlat avangin a thlâwna thisen petute chu fakawm a tih thu a sawi a; AVBD hmalakna ropui a tih thu sawiin, a thlawna thisen pekin 100% a kài theih nan ṭan la chhunzawm zel turin a fuih.

AVBD bultumin Voluntary Blood Donation Award 2022 sem a ni a, pawl hminga thisen pe ṭhate hnenah chawimawina hlan a nih bakah, kum danga tih ngai loh - mimal thisen pe ṭha, vawi 50 pe tling tawhte chawimawina hlan a ni. Thisen vawi 50 pe tling tawh hriat theih chin chu mi 27 an ni.

Páwl zinga kum 2021-22 chhunga Mizoram puma thisen pe tam ber chu KṬP niin, unit 3,968 an pe a; National Service Scheme (NSS)-in dawtin, unit 3,694 an pe a, pathumna chu unit 1,924 petu YMA a ni.

World Blood Donor Day hmannaah hian Health secretary R Lalramnghaka, State Blood Transfusion Council chairman ni bawkin thisen pek dinhmun tlangpui a sawi a; thisen dawng ṭhin mi pahnih aṭangin testimony ngaihthlak a ni bawk.

World Blood Donor Day pual hian district ṭhenkhatah thisen pek huaihawt a ni a, thisen pek zawng zawng chu unit 219 a ni.