CM-in dâwt a sawi lo - MNF party

MNF party chuan thu­chhuah siamin, Mizo­ram State Health Care Scheme (MHSCS) chung changah chief minister Zoramthanga'n dâwt a sawi lo niin an tarlang.

CM Zoramthanga'n, 'MSHCS atan Congress party-in kum 10 sorkarna an chan chhungin cheng khat mah an dah lo. Kan awm loh chhungin cheng khat mah dah belh a awm lo,' tia a sawi chu MPCC-in dawt sawiah an puh tih tarlangin MNF chuan, "Hei hi dâwt a ni lo. Health care scheme kan sawi hian chi hnih central scheme - AB-PMAY (Golden Card) leh Mizoram sorkar scheme MSHCS a ni," an ti.

MNF chuan, MSHCS chu an party bul ṭan nia tarlangin, "State dangte'n state sponsor-a healthcare an kalpui ve hma daih April 2008 khan MNF sorkar bul ṭan a ni. A tirah state plan fund hnuaiah cheng vbc. 50 dah a ni," an ti a, thil thar a nih angin Central HFW consultant-te rawtna angin insurance company nen thawh dun a nih thu an sawi.

MNF tarlan danin, MSHCS hnuaiah hian natna zawng zawng Rs 1,00,000 thleng bill theih a ni a, natna khirh bikah Rs 2,00,000 dang bill belh theih a ni.

MSHCS kalpuina atan sum báwmpui (corpus fund) siam a ni a, sorkar sum ei hêk tawh loa intodelh thei tura duangin MNF sorkarin kum 2007 tawp lamah Asian Development Bank (ADB) hnuaia structural adjustment loan a dil a, kum 2009-ah agreement ziah a ni a, kum 2010-ah cheng vbc 117 hmuh a ni. Hetih hunah hian Cong­ress sorkar a lo piang tawh.

Congress sorkar tharin Reliance company-in bill pek chhuah loh an neih tam vang leh Plan Fund aṭangin cheng vbc. 10 chu Bajaj Allianz (fortune plus)-ah invest a nih chhuanlamin April 2009 - August 2010 thleng MSHCS a kalpui lo nia sawiin MNF chuan, "September 2011 aṭangin company hnuaia pawisa invest loin MSHCS tiin bank hrang hrangah investment a ti a ni," a ti.

MNF tarlan danin, a tira cheng vbc 50 dah leh Bajaj Allianz-a cheng vbc. 10 dah hmin tawh chu a pung cheng vbc. 1.3 vel a ni a, sum báwmpuia a pung pawh kum hnih chhung hman a ni lo. Tichuan, a pung nen sum báwmpuia tlingkhawm chu vbc. 155.56 a ni.

MNF chuan, "Congress kum 10 sorkar khan anmahni kutkawih leh state sum aṭangin MSHCS-ah cheng khat mah an dah belh loh bakah, health care hnuaia bill theihte chu natna khirh bik (critical illness) chauh a ni. Congress sorkar laia corpus fund an tihte khi MNF sorkar hmalakna vek a ni zawk," an ti.

December 2018-a MNF sorkar a pian leh hnuah October 2019 aṭangin policy tharah natna zawng zawng bill theih turin siam a nih thu tarlangin MNF chuan, "SEDP aṭangin cheng vbc 20 sanction nghal a ni," an ti a; kum tin sum báwmpuiah vbc. 50 dah belh zel tura ruahman a nih angin kum 2020-21 khan vbc. 50 dah a nih thu an tarlang bawk.