Health care bill bá rulhna tur sum dil vbc. 1,000 Central-in a pawm - Health Minister

Health & Family Welfare minister Dr R Lalthangliana chuan, Mizoram State Health Care Scheme (MSHCS) bá rulhna tur sum Asian Development Bank aṭanga pûk turin sorkar laipuiin a pawmpui thu a sawi.

Dr R Lalthangliana hian nimin khan World Blood Donor Day hman­naah thu sawiin, MSHCS-in Health Care Scheme-a bill thehluttute sum pek tur cheng vbc. 70 dáwn a bat mek thu a sawi a, a rulhna turin Mizoram Finance department-in Asian Development Bank (ADB)-ah soft loan cheng vbc. 1,000 an dil thu a sawi a ni.

Cheng vbc. 1,000 chu sorkar laipui hnenah rulhpui tura dil ni mah se, sorkar laipuiin sum lama harsatna a tawh ve tho avangin Mi­nis­try of Finance hnuaia Department of Expen­diture chuan state sor­karin rûl mai turin a rawt tih a sawi bawk.

Health Minister chuan, Mizoram sorkar hotu lúte'n vawi tam tak sorkar laipui hotute an dàwr hnuah Mizoram aṭanga rawtna thlen chu June 13, Thawhṭanni zan khan Finance Ministry Screening Committee-in an pawmpui thu an rawn hrilh tih a sawi a ni.