KHAWTHLIR

Zokhawsang enfiah
Home secretary H Lalengmawia kaihhruaiin nimin khan Joint Inspection Team chuan Assam Rifles insawnna tur hmun, Zokhawsanga in sak, kawng siam leh Assam Rifles hotute'n an duhkhawp loh lai leh la zawh loh laite an enho a; Assam Rifles hotute nen an inkâwm bawk.

Thisen pe
Nimin khan Dawrpui Vengthar YMA chuan YMA Day pualin an hall-ah thisen pek an huaihawt a, Civil Hospital, Aizawl tan thisen unit 134 an pe a, petute mipa 122 leh hmeichhia 12 an ni. Chhandamna Kohhran STP, Chaltlang ten Synod Hospital tan thisen unit kua an pe bawk.

Art Workshop
Information & Public Relations department leh Mizoram Art Development Society buatsaih MADS Annual Art Workshop, 2022 chu nimin khan Aizawl Art Gallery-ah IPR director C Lalnunkima'n a hawng. Workshop-ah hian mi 58 an tel a, June 17, 2022 thleng neih tur a ni.

Project hawng
Sericulture minister Dr K Beichhua chuan nimin khan Bawngkawn South YMA Hall-ah 'Eri Silk Development Project' leh 'State Level Silk Samagra-2 Workshop' a hawng a, Sericulture department buatsaih pangang vulh lama puitu lehkhabu a tlangzarh. Central Silk Board member secretary Rajit Ranjan Okhandiar chuan Silk Samagra-2 hnuaia cheng nuai 1718.17 hmanga kalpui tur Eri Silk Development Project a hawng bawk.

Coffee roaster
Mizoram University vice chancellor Prof. KRS Sambasiva Rao chuan nimin khan Tribeland Coffee Roasters a hawng. Tribeland Coffee hi Mizoram coffee roaster hmasa ber a ni a, MZU BioNEST Incubation Centre-ah an in bun tawh a ni.

Pipe phum enfiah
Co-ordination Committee on Management of Aizawl City member-te chuan nimin khan Vaivakawn Traffic Point aṭanga Chanmari West panna kawng, Hunthar lei tlahniam inkara SIPMIU tui pipe phumna chu a hmunah kalin an enfiah a, chhunzawm leh thuai dan tur sawiho nghal a ni.