Farkawnah vawk 2,800 chuang thi tawh

Vawk pûl hri, African Swine Fever (ASF) vanga kumin 2022 bika Mizorama vawk thi leh suat tamna ber Farkawnah nimin thleng khan vawk thi leh suat belh khawm chu 2,800 chuang a ni tawh a, cheng nuai 600 chuang an hloh tawh.

Farkawn khawtlang hruaitute chuan Vanglaini palai zawhna chhangin, Farkawn khuaah chhungkaw 700 vel an awm a, chhungkaw 40 vel chu lo neia eizawng an ni tih an sawi a, "A bâk zawng chu vawk vulh hmanga eizawng kan ni. Vawk vulha eizawng zinga chhungkaw panga vel chuan khaw dáiah farm an siam a, khaw chhunga vulh tam deuh chuan vawk 40/50-te an vulh," an ti.

ASF léng chu chhungkaw tam tak eizawnnain a tawrh thu sawiin Farkawn khawtlang hruaitute chuan, "Kan chhinchhiah chinah vawk thi 2,800 chuang kan phúm tawh a, vawk vulh zawng zawng chán chhungkaw eng emaw zat an awm," an ti a; ASF vanga vawk thi avangin chawhrualin cheng nuai 600 chuang an hloh tawh tih an sawi.

Farkawn khawtlang hruaitute chuan, vawk thi buaipui nan AH&Vety department aṭangin Rs 35,000 leh bialtu MLA-in MLA fund aṭangin Rs 50,000 a pe tawh tih an sawi a, "Vawk thi phurh kual, phûm leh a kaihhnawih thilah cheng nuai khat chuang kan séng tawh a, heng atan hian chhungkaw tinah Rs 200 kan khawn a, VC lam pawhin sum pûk kual dan kan zawng bawk," an ti.

Chief Minister leh AH&Vety Minister-te an hmuh tawh thu sawiin, "Vawk thi avanga kan sum hloh bakah, vawk thi buaipuinaah sum tam tak kan séng tawh. Loan làa vawk vulh kan tam avangin loan rulh chungchanga hma min laksak turin CM kan kâwm a, kan ngaihtuah dawn, tiin min chháng. AH&Vety Minister pawhin sorkar laipuiah zangnadawmna dil mek a nih thuin min chháng," an ti bawk.