District-ah World Blood Donor Day hmang

Nimin khan Mizoram hmun hrang hrangah World Blood Donor Day hman a ni a, district ṭhenkhatah chuan WBDD pualin thisen pek huaihawt a ni.

Lungleiah chuan MSACS, AVBD leh Leitlangpuii HSS NSS-te'n Leitlangpuii HSS-ah WBDD an hmang a, Lunglei district-a thisen pe ṭha, pawl leh mimalte chawimawi an nih bakah, thisen pek huaihawt a ni.

Lunglei AVBD president Dr SR Ngurchamliana, medical superintendent ni bawk chuan, Lunglei district-a blood bank pahnih - Civil Hospital leh Christian Hospital, Serkawnah kum 2021-22 chhungin thisen unit 3,557 pek a nih thu leh chu'ng zinga 98.48% chu a thlawna pek a nih thu a sawi.

Pawl hminga thisen pa ṭhate hnenah chawimawina hlan a ni a; thisen pe ṭha berte chu - kohhran huangah Lunglei Bazar Pastor Bial ṬKP (unit 304), zirna-inah Lunglei College NSS (unit 139), NGO-ah Haulawng Branch YMA (unit 75) leh pawl dangah John Williams Hospital (unit 87)-te a ni. Lunglei district-a mimal thisen pe tam bera chhinchhiah NG Lalbiakdiki, Bazar Veng (vawi 30) leh Lalhmingchhuanga Chhangte, Bazar Veng (vawi 53)-te chawimawi an ni bawk.

WBDD pualin Baptist Higher Secondary School NSS-te'n Christian Hospital, Serkawn tan thisen unit 83 an pe a, petute mipa 45 leh hmeichhia 38 an ni.

Siahaah chuan Siaha Higher Secondary School hall-ah hman niin, district bawrhsap Lalsangliana'n a hmanpui a, Siaha AVBD president Lalnunkima Pisa-in inkhawm a kaihruai. WBDD pualin Siaha HSS zirlaite'n thisen an pe a, mipa 37 leh hmeichhia 20-te'n thisen unit 57 an pe a ni.

Champhaiah pawh Champhai Higher Secondary School-ah WBDD hman a ni a, kum 2021-22 chhunga thisen pe pawlte hnenah chawimawina hlan a ni. Champhai district-a thisen pe ṭha ber pawlte chu - kohhran ṭhalaiah Ruantlang Bial KṬP, zirna-inah Champhai College leh NGO-ah Samthang Branch YMA-te an ni. Hmeichhe zinga thisen pe tam F Lalchhanhimi (vawi 28) leh Chawngzikpuii (vawi 28)-te chawimawi an ni bawk.

WBDD pualin Champhai Higher Secondary School NSS-te'n thisen unit 17 an pe a, petute mipa 16 leh hmeichhia pakhat an ni.

Kolasib-ah chuan AVBD, Blood Bank leh College Veng Branch YMA-te'n College Veng YMA Hall-ah WBDD an hmang a, Sub-hqrs YMA president Thomas D Lalengliana'n a hmanpui. Kolasib AVBD president R Lalramchhana'n a kaihruai a, blood bank officer Dr Janet Zoremnghaki'n an district-a thisen pek dinhmun a sawi.

Kum liam taa Kolasib district-a pawl hminga thisen pe ṭha berte chu - kohhran pawlah Kolasib Vengthar Branch KṬP, YMA-ah Diakkawn Branch, zirna-inah Kolasib College NSS-te an ni. College Veng Branch YMA-te'n thisen an pe nghal a, mipa 19 leh hmeichhia 10-te'n thisen unit 29 an pe.

WBDD hi Serchhipah pawh AVBD leh District Hospital Blood Bank bultumin Serchhip CMO Conference Hall-ah hman a ni a, thisen pe ṭhate an chawimawi bakah, thisen pek pawimawhzia inzirtirna hun atan an hmang.

Serchhip district-a thisen pe ṭha ber pawlte chu - kohhran lamah Serchhip Vengchung Bial KTP, zirna-inah Serchhip College NSS, YMA-ah Thentlang Branch leh, pawl dangah PTS, Thenzawl-te an ni.

Lawngtlaiah chuan WBDD pualin thisen pek huaihawt a ni a, mipa 13 leh hmeichhia 11-te'n District Hospital tan thisen unit 24 an pe. Mamitah pawh WBDD hmangin, thisen pe ṭhate chawimawina hun an hmang a, Mamit College NSS-te'n thisen unit kua an pe bawk.

Hnahthialah chuan AVBD huaihawtin Hnahthial Higher Secondary School-ah WBDD hman a ni a, thisen pek chungchang inzirtirna hun atan hman a ni.