Kawng laihin lui a tihchhiat dan sawifiah

Youth for Environment Justice Mizoram (YEJM) chuan nimin khan Aizawl Press Club-ah thuthar thehdarhtute an kâwm a; National Highway Infrastructure Development Corporation Limited (NHIDCL)-in Mizoram hmun hrang hranga kawng an laihna leivûng paih danin lui hrang hrang a tih bawlhhlawh thu an sawi.

YEJM thupuangtu Lalrinfela chuan, NHIDCL-in lei an laihna vûng an paih dan a dik loh avangin Mizo lo neih kalphung, ramngaw leh nungcha, tuihna leh luite a chhiat nasat thu a sawi a, "Kan ecosystem chhe tawh tak chu NHIDCL-in Mizoram hmun hrang hranga kawng an laihnain a tihchhiat belh nasa hle," a ti.

NHIDCL executive director Virendra Jakhar-a'n leivûng an paih danah thu belhchian dâwl lo a sawi tih sawiin Lalrinfela chuan, "Virendra Jakhar hian June 7, 2022 khan DDK Mizoram palai hnenah an kawng laih vûng thehthang chungchangah dan loa tih an neih loh thu leh leivung paih lohna tura an paih loh thu a hrilh a, dâwt ngialngan a sawi. NH-54, NH-06, NH-102B leh NH-302 ah hian dan loa leivûng an paih enho tura kalpui turin YEJM chu kan inpeih a, amah pawh lo inpeih ve nghal rawh se," a ti a; Virendra Jakhar-a'n DDK hnenah Forest department hotute nen enho a huam thu a sawi angin EFCC hotute'n enpui ngei se an duh thu a sawi bawk.

YEJM tarlan ṭhenkhat
1. May 27, 2022-ah YEJM-in EFCC Principal Chief Conservator Forrest hnenah NHIDCL hnathawh lai zawng zawng stay order pe a, environment an tihchhiat tawh siamṭhattir tura phûtna lehkha an pe.
2. PCCF-in hma a lak hma chuan silent strike neih tumin EFCC pisa kawtah lungawi lohna an lantir.
3. PCCF chuan Divisional Forest Officer (DFO)-te chu NHIDCL hnathawhna hmunah inspection neia environment law an zawm loh chuan stay order pe turin thupek a tichhuak.
4. DFO division - Aizawl, Champhai, Thenzawl leh Lunglei-te'n environment violation a awm ngei tih an hmu a, NHIDCL kawng laih mekte chawlhsan turin stay order an pe.
5. NH-54 leh NH-06 a an hnathawhte YEJM-in an en zui a, NHIDCL-in hmun ṭhenkhatah hna an chhunzawm lui a, leivûng pawh luiah an la paih zel.
6. Kawng an laih dawna tih ngei ngai Environment Impact Assessment (EIA) an la zâwm lo.
7. NHIDCL kawng laihna hmun 99.9%-ah lui kawr leh luite (seasonal leh perennial river)-te leivûngin a chhilh vek.
8. Virendra Jakhar-a’n kawng laihna hmun hrang hrang 138-a leivung an paihte chu DC phalna veka paih a nih thu a sawi.
9. DC-te hian phalna an pe a nih chuan a mawh an phur tur a ni a, DC-te hi dawta a puh a nih chuan Mizo mipuite hi DC-te thlavang hauhin an hmaah kan ding ang.
10. NHIDCL-te hnena tangka sum dil in lo awm a nih chuan ram leh hnam phatsantuah kan puh dawn che u a ni.