Cancer damdawi sawifiah

Health Services joint director (Food & Drugs Administration) Lalsawma chuan, Cancer damdawi hmuh chhuah thar a awm ni àwm taka thu thang chungchang sawifiahin, Dostarlimab chu cancer damdawi atana hman reng tawh ṭhin, medical oncologist-te hriatpuina nen chauha fimkhur taka hman ngai a nih thu a tarlang.

Lalsawma chuan, "Tunlaiin Mizoramah cancer damdawi chi khat, Dostarlimab chu mithiamte'n tâi (rectum) cancer atan a ṭha a ni tih an zirchianna England Journal of Medicine-a June 5, 2022-a an chhuah, an thuziak ṭhenkhat Mizo ṭawnga lehlin facebook leh whatsapp group hrang hranga thawn darh a nasa tih hriat a ni. Dostarlimab hi cancer damdawi atana hman reng tawh ṭhin a ni a, medical oncologist-te hriatpuina nen chauha fimkhur taka hman ngai a ni," a ti.

Damdawi dang ang bawkin a hman ṭangkai theihna dang an dapna lamah zirtute'n rectal cancer enkawl nan a ṭha tih an hmuh belh tih tarlangin Lalsawma chuan, "A lawmawm hle a, damlote tan hman theiha chhawp chhuah a la ni thuai ang tih beisei ila," a ti a; damdawi lama hma latute'n a hunah chuan hma an lak mai dawn thu leh cancer natna vei mekte hman mai theih tur anga a zuar rawngkaia hma lo lak phei chu dan kalh tlat a nih thu a tarlang bawk.