Hospital sak tur chungchang sawiho

Power Grid Corporation of India Limited corporate social responsibility fund cheng vbc. 21 hmanga sak tur Serchhip District Hospital building thar sakna hmun tur chungchang ngaihtuahin Serchhip DC Nazuk Kumar hoin Bukpui lama sak duh NGO Co-ordination Committee aiawhte leh a hmun ngaia sak ṭha zawka ngai Joint Action Committee aiawhte an ṭhukhawm.

Serchhip DC chuan hospital building thar sakna hmun tur thlang tura ṭhukhawm an nih loh thu sawiin, "A sakna hmun tura ngaihdan inang lo awm mekah thu inhmu tak leh inhruipawhna boruak ṭha lo awm loa sorkarin sak a duhna lam apianga ṭha taka kan sak theih nana rilru puitling tak kan put theih nan inkawm hona kan buatsaih a ni," a ti.

NGO Coordination Committee hruaitute hian sorkarin sak a duhna lam apiangah dodal loin an pawmpui thei tih an tarlang a, Joint Action Committee lam pawh hian sorkarin District Hospital in a mamawh thil dangte nen, felfai taka a sak theih dawn phawt chuan khawi hmunah pawh sa se sawiselna an nei lo tih an tarlang bawk.