Covid-19 vei hmuh chhuah zat a pung

June 13, Thawhṭanni khan Mizoramah Covid-19 vei mi 45 hmuh chhuah a ni a, tun thla (June)-a hmuh chhuah tam ber ní a ni. Nimin khan hripui vei dam tawh mi 20 chhuahtir an ni a, Covid-19 positive thi an awm lo.

Thawhṭannia Covid-19 positive hmuh chhuahte chu mipa 19 leh hmeichhia 26 an ni a; TrueNAT hmanga hmuh pakhat leh RAT hmanga 44 niin, sample endik zawng zawng 423 aṭangin 10.64% a ni.

June 13-a hripui vei hmuh chhuah zat 45 hi tun June thla mai bakah, May 23, 2022 hnua hmuh chhuah tam ber ní a ni a; enkawl lai (active case) pawh a pung hret hret a, 80 aia tlema a tlakthlak tawh hnuah tunah chuan mi 170 an awm leh mek tawh.

IDSP record angin, Mizoramah Covid-19 vei 2,28,620 hmuh chhuah a ni tawh a, mipa 1,06,436 leh hmeichhia 1,22,184 an ni a, mipa aiin hmeichhia 15,748-in an tam zawk. Nimin tlai dar 5 thleng khan mi 2,27,749 (99.62%) chhuahtir an ni tawh a, mi 701 (0.31%) thi tawhin, enkawl mek mi 170 (0.07%) an awm.

Nimin tlai dinhmun angin, Mizorama district 11 zinga district pali - Siaha, Champhai, Lawngtlai leh Hnahthial district-ahte Covid-19 positive an awm tawh rih lo a; chutih laiin, Saitual leh Aizawl district-ah mi 49 ve ve, Mamit district-ah mi 35 an la awm thung.

Kum 2011 chhiarpui aṭanga chhûtin, Covid-19 positive hmuh tawh zat 2,28,620 chu 20.83% a tling tawh a, mi 1,000 zelah positive 208 an awm ang a ni. Mihring 1,00,000 zelah hripui vangin mi 63 an thi tawh ang a ni bawk.