District thar din dan zirchiang tur Sorkarin committee a din

GAD changtu chief minister Lal Thanhawla chuan, Mizorama district tehfung emaw, district thar din dan tur emaw hriat theih a la nih loh thu Assembly session neih zawh taka MNF member Lalruatkima zawhna ziaka chhangin a tarlang.

Chief Minister tarlan danin, June 16, 2016 khan Chief Secretary kaihhruaina hnuaiah District Re-organisation Committee din a ni. Committee hi vawi thum an ṭhukhawm tawh a; district hrang hrangte dinhmun te, district thar din leh a ṭulna te, district awm mek siam rem leh tihchangtlun chungchangte an zir chiang mek a ni.

Committee hian sorkarah report a la thehlut lo a, chu vang chuan district tehfung emaw, district thar din dan tur emaw hriat theih a la ni lo. District thar siam chu thil lian tham a nih avangin sorkarin zir chian ṭul a ti a, district atana puan tawh khaw pathum - Hnahthial, Khawzawl leh Saitual-te pawh District Re-organisation Committee-in a ṭul anga rawtna a siam tura dah a ni.

Mizoram khaw hrang hrangte leh khaw ṭhenkhat hlawm lian deuhte aṭangin district thar siam dilna a awm ṭhin thu tarlangin CM Lal Thanhawla chuan, "District Re-organisation Committee din a nih hnu hian district thar dilna eng emaw zat a awm leh a, Kamalanagar pawhin district an dil ve a ni. Dilna lutte hi Committee hian a ngaihtuah mek a, rawtna awmte hi sorkarin a en zui ang," a ti.

Tun dinhmunah Mizoramah district pariat - Aizawl, Lunglei, Siaha, Champhai, Kolasib, Serchhip, Lawngtlai leh Mamit a awm mek a ni. Hnahthial, Khawzawl leh Saitual-te chu kum 2008 khan district atan puan ni tawh mah se, a nih tur anga function tir an la ni lo.