Ram dinchhuahna a mi chengte Kuta awm a ni - Zoramthanga

MNF president Zoramthanga chuan sawm a nih angin nimin khan Mizoram University-a Geography department zirlaite hmaah thu a sawi a; Mizote chu Pathianin engkim ṭhat duhna hmunah a dah tih sawiin, "He ram ṭha em em mai kan neih hi humhim a, kan dinchhuahpui theihna tura buatsaih hi a mi chengte kutah a awm," a ti.

Zoramthanga chuan, nationalism-in a tum ber chu ram venhim a ni tih sawiin, "Kan hnam, kan ṭawng, kan sakhua hi a him tur a ni a, theihtawp kan chhuah a ṭul hle. Hnam hlawm lian tak takin kil thumah min hual a, anni hian kan ram ṭha tak maiah hian rawn luh an chak em em a, kan fimkhur a ṭul hle a ni," a ti a; Mizote chu hnam tlem an nih avangin fimkhur a ngai a, fîr a ṭul bawk tih a sawi.

MNF thuchhuah chuan, nimina Mizo Hnam Rûna chhung inkhawmah Zoramthanga'n MNF party zawm thar voter 50 vel a lawm lut niin a tarlang a; lawm luh zingah Geology & Mineral Resources director hlui Dr H Lallenmawia pawh a tel.