SUH hmangin home 48 ṭanpui tawh

Deendayal Antyyodaya Yojana-National Urban Livelihood Mission (DAY-NULM) hnuaia Shelter for Urban Homeless (SUH) scheme hnuaia hmalak tawhna home hrang hrangte pualin nimin khan IPR directorate conference hall-ah training buatsaih a ni a, UDPA minister Zodintluanga a hawng. SUH hnuaiah Mizorama home 48-ah ṭanpuina pek tawh a ni.

Zodintluanga chuan, SUH scheme chu Supreme Court thutlukna anga kalpui a nih thu sawiin, "State hrang hranga hmalakna leh hmasawnna hi Supreme Court-in a vil reng a, chuvang chuan scheme-in a sawi ang thlapin report thehluh leh en zui hna thawh a ni dawn," a ti.

UDPA Minister chuan, Aizawl district-a SUH scheme kalpui mekah home pakua thawm ṭhat hna thawh a nih tawh thu leh home 10 dang chei ṭhat tura ruahman mek a nih thu a sawi.

Nimina training-ah hian project director HVL Zarzoenga’n DAY-NULM nihphung a sawifiah a ni.

India ram khawpui hrang hrangah riahna mumal nei loa khawlaia riak mai mai an tam a, chu'ng mite tana riahna tur him zawk buatsaih ṭul tiin Supreme Court-in thupek a chhuah a; chu thupek bawhzui chuan Ministry of Housing & Urban Poverty Alleviation-in DAY-NULM hnuaiah SUH scheme a siam a ni.

Kum 2014-15 aṭangin hmalak ṭan a ni a, sorkar kum kal mek thlengin SUH hnuaiah shelter unit hrang hrang Rangvamual, Zemabawk, New Serchhip leh New Siahaahte sak a ni. Champhai, Lunglei, Kolasib, Lawngtlai leh Falkawn (Aizawl)-ahte sak leh turin DPR peih a ni tawh. Heng bakah hian, home/centre awm sa chei hnûm leh an mamawhte pêk a ni tawh a, Mizorama home 48-ah ṭanpuinate pek a ni tawh.