Dan kengkawhtu nihna chiang turin Chief Minister-in police-te a chah

Chief minister Lal Thanhawla chuan, police-te chu dan kengkawhtu an nihna hre chiang nawn turin a chah a, "Dan leh hrai hnuaiah mi kan inang vek a, mi lian leh tê an awm lo, rethei leh hausate pawh kan inang tlang vek a ni," a ti.

Nimin khan Police Headquarters (PHQ)-ah Mizoram Police officer-te'n conference vawi hnihna an hmang a; khuallian Chief Minister chuan, "Dan leh hrai kenkawh kawngah hlaih neih bik a thiang lo tih kan hriat nawn fo a pawimawh," a ti a, dan kenkawhnaah mihring dikna chanvo, human right zah chunga hmalak tur a nih thu a sawi.

Ram ṭhang zelah thubuai khirh tak tak a awm zel a, cyber crime phei chu chinfel awlái lo tak a ni tih sawiin, CM Hawla chuan, "Police tan chona a tling. Police hna hi intuai hriam reng ngai a ni a, Forensic Science Laboratory-te pawh thil chhui kawnga ṭangkai taka hman a ngai," a ti.

Lal Thanhawla chuan, physical fitness leh mahni inthununna chu police tan a pawimawh zual tih sawiin, "Police chu an fit tur a ni," a ti a; venhimna kawngah rang taka che chhuak thei tur, rapid force-te Mizoramah pawh mamawh chhoh a ni tawha a lan thu a sawi.

Mizoram chu interna­tional boundary thui tak nei nei a nih avangin mi firfiakte kut tuar ve thei a ni tih sawiin, Hawla chuan, "Hemi kawngah hian ram chhung venghimtute an muthilh leh lo inthlahdah a thiang lo," a ti a; POCSO leh hmeichhe kaihhnawih thubuai, fimkhur ngai bikte khawih tura police hmeichhiate an tlem tih sorkarin a hriat thu sawiin, hmeichhe tam zawk police-ah an luh theih nan sorkarin ngaihtuahna a sên mek thu a sawi bawk.

Home minister R Lal­zirliana pawhin thu sawiin, khawtlangah muanna a awm theih nan mipuiin police an thawhpui ṭha hlea a hriat thu a sawi a; hmun ṭhenkhatah police-in thil sual tia puh an man tawh hmel hmuh duh vanga police nawr buai ching an awm ṭhin chu vanduaithlak a tih thu sawiin, "Police-te hnathawk tur tihbuai hi thil zahthlak leh dan bawhchhiatna tho a ni," a ti.

R Lalzirliana chuan, tun hnaiah ram hruaitu lu leh a chhungkua dinhmun hlauhthawnawma dan bawhchhiate'n an dintir chu a pawi a tih thu sawiin, "MRP leh battalion lama sipaite zingah buaina rang taka tudai tur engemaw zat inrálring renga awm tur ruahman a ngai a ni," a ti a; police-te chu inthu­nunna leh hriselna ngai pawimawh turin a chah.

Police Officers' Con­ference with Chief Minister-ah hian President's Police Medal for Distinguished Service chu LH Shanliana leh Joseph Lalchhuana te hnenah hlan a ni. Jimmy L Renthlei, VL Hma­ngaihzuala, Manik Lal Das, B Lalnghakliana, K Laltluangliana, leh Lal­rinawma te hnenah Police Medal for Meritorious Service hlan a ni thung.

Police-in an tarlan danin, Mizoram Police-ah post 12,064 a awm a, tunah mi 9,637 awm mekin, post ruak 2427 a awm. Police-ah hian range pahnih, district pariat, sub-division 16, police station 40, outpost 16, battalion outpost 68 a awm mek a ni.