KHAWTHLIR

Centenary lawm
Lawngtlai district-a Lungzarhṭum khua chuan Ningani khan an khaw khelmualah an khaw kum 100 (centenary) tlin an lawm a, parliamentary secretary H Zothangliana'n a hmanpui. Centenary pual hian Lungzarhṭum Tlangpui leh Bethel Tlangahte centenary mei an dêt a, tlaiah khawtlangin ruai an ṭheh a ni.

Court-in ngaihtuah
Mizoram Public Service Commission-in Health & Family Welfare department hnuaia staff nurse hna thawk tura lak (recommendation a siam), Mizoram sorkarin a pawm loh chungchang chu Gauhati High Court, Aizawl Bench-in a ngaihtuah mek nia thu dawn a ni.

END Commissioner
Excise & Narcotics commissioner Lalhmunsanga chu nimin khan sorkar hna aṭangin superannuation pension-in a chhuak a; nimin vek khan Excise & Narcotics commissioner atan deputy commissioner ni lai Ngurchungnunga Sailo ruatna, appointment order a chhuak nghal.

Thisen pe
Govt. Aizawl College NSS Unit-te chuan nimin khan an college-ah blood donation camp an huaihawt a, Aizawl Civil Hospital tan mipa 88 leh hmeichhia 48-te'n thisen unit 136 an pe. Tun ṭum hi academic session kal laia donation camp an huaihawt vawi hnihna a ni.

Camp khâr
March 27-30, 2017 chhung khan State Training Centre, Tanhrilah North East Region Rashtrapati Scouts & Guides Testing Camp neih a ni a, March 30 khan khârna inkhawm hman niin, Aizawl DC Kannan Gopinathan-a'n a hmanpui. Kannan Gopinathana chuan, state hrang hrang aṭanga kalkhawmte chu training-a an zirte mi dang ṭanpuina kawnga hmang ṭangkai turin a chah.

Hmalakna sawiho
MIFCO Board of Directors chu nimin khan an chairman PC Zoram Sangliana, MLA hoin NLUP conference hall-ah an ṭhukhawm a, an hmalakna hrang hrangte leh hmalak zel dan turte an sawiho.