CM-in INC MLA-te thusawi a chhan Politician-te an chhel ka ti - Hawla

MPCC president Lal Thanhawla, chief minister chuan nimin khan Congress Bhavan-ah thu sawiin, an party MLA-te thusawi dan a chhan a; politician-te'n sawiselna an tawh nasat thu sawiin, "An chhel ka ti hle a ni," a ti.

Lal Thanhawla chuan, politician-te chuan pulpit tlang aṭang thlenga sawiselna an tawh thu sawiin, "Politician-te hian sawiselna an tâwk nasa hle a, an khin lêt úr úr ka hre ngai lo," a ti a; sawi­selna nasa tak an tâwk chunga an khin let ngai loh avangin Mizoram politician-te chu chhel a tih thu a sawi.

Pastor zinga zu tlem tlem in ṭhin an awm tih House-a INC member K Lalrinthanga'n a sawi chungchangah MPCC President chuan, "Khawi lai nge huat tur le. Hua an lo awm a nih chuan a sawituin 'Pastor zu tlem tlem in ṭhin' a tih hi zâwt chhuakin an ṭawngṭaisak turah ka ngai," a ti.

Lal Thanhawla chuan, House-a INC member John Rotluangliana thusawi chungchangah, a

ṭhian pakhat thu a sawi chhawn lai tiboa thehdarh a nih thu sawiin, "Hei pawh hi ṭha lo ti an awm chuan an ṭawngṭaisak tur­ah ka ngai," a ti a; K Lalrinthanga leh John Rotluang­liana thusawi sawi­sel zingah ṭawngṭaisak tum zawnga thusawi an awm a hriat loh thu a sawi.

MPCC President chuan, an party-in lemchan an duh loh thu sawiin, "Tlema zu hua anga inngaite duh zawng chu tih duh ila, eptu member resolution put luh hi eptute dai khalhin kan pass mai ang. Pass mah ila MLPC Act hi ṭhiah nghal a ni tihna a ni lo a, dan tihdanglam a ngai dawn a, eng chen nge a awh ang tih pawh hriat a ni lo," a ti.

Eptu lamin resolution an put luh chhan chu ngaihtuah a ṭul thu sawiin Lal Thanhawla chuan, "Mi ṭan hlawh duhna atan mai maia resolution pu lut an ni. Zu duh loin kawng pawh an zawh duh tawh lo," a ti a; zu zawrh duh loh kawngzawhnaah zu lei phalna card nei an tam ṭhin niin a sawi.

Lal Thanhawla chuan, PWD leh Power & Electricity department-te a chan ṭhin chhan sawiin, "Corruption vêng thei ber turah ka inngaih vang a ni. Contractor-te nena inthurualin ka chan tur pakhatmah ka la siam lo. Engineer-te'n sawi tur an hria a nih chuan thu dik lo a ni ang," a ti.

Parliamentary secretary K Lalrinthanga pawhin thu sawiin, "House-a thu ka sawi lak lawh laiin ka rilrua pastor zu tlem tlem in ṭhin tih hi a rawn lang thut a ni. Ngaihdamte ka dil tawh nã a, thil dik hi mi hian hria se, Pathian hian a duh a ni ang tih chu rilruah a awm," a ti a; a thusawi laiin kohhran upa leh pastor zu in ṭhinte a rilruah an lang uai uai niin a sawi.