MCHTA hruaitute thubuai tihtawp ngen

Mizoram CSS Hindi Teachers Association (MCHTA) chuan thu­chhuah siamin, an pawl hruaitute leh member ṭhenkhat, ppolice-in an mante chu a rang thei ang bera an thubuai tihtawpsak turin an ngen.

MCHTA chuan, March 29, 2017-a an member mi 23 man an ni chu mak an tih thu sawiin, "Min man chhan pawh sawi loin Teachers Inn-a damlo kan member-te’n bungrua senghawi lai man kan ni a, chhung­te pawh hrilh thei loin phone pawh laksak vek kan ni," an ti.

Chief Minister bang­la an luhchilh chung­changah, "Kan member chawnghei chau nikhaw hre loa tlu chu ambulance koh tuma phone a ni a, amaherawhchu doctor rawn kal thei an awm loh thuin min chhang a. Hemi vang hian CM hnena thu thlen tum a kal mai kan ni a, buaina siam tum emaw, bungraw tichhe tura kal kan ni lo," an ti a; bungraw tihchhiat an nei lo niin an sawi.

Sorkara dah ngheh phûta chaw an nghei­naah nauchhiat mi pali an awm nia sawiin, MCHTA chuan, "Chuti chung pawha inngaihsakna a awm lo hi ná kan ti a. 'Zirtirtu tlak an ni lo’ tia Assembly House-a sawi chhuak hi ná kan tiin pawi kan ti hle. Sorkarin DPC kaltlanga dan dik taka a lak, qualify vek kan ni," an ti.

MCHTA chuan, investigation/evaluation team lo kal turte chu Bihar aṭangin ni loin, Lucknow aṭanga lo kal tur an nih thu sawiin, "Bihar aṭanga lo kal tih thuthang awm hi thu belhchian dâwl lo a ni. 'Lo kal tawh' tia sawi awm leh sikula thawk Hindi teacher-te an endik a, an thiam lo lutuk tih hi thu dik lo a ni," an ti a; thawktute'n evaluation team an lo kal tawh âwm an hriat loh thu an tarlang.