Khawzawlah Mizo ṭawng zirho

Pachhunga University College (PUC)-a Mizo department leh Khawzawl College-te chuan nimin khan Khawzawl Zuchhip YMA Hall-ah 'Mizo rochun thu leh hla zirchianna' an buatsaih a; bialtu MLA Lalrinliana Sailo khuallian a ni.

'Seminar on Rethinking Mizo Orality: Approaches an Prospects' ah hian Lalrinliana Sailo chuan, Mizo ṭawng dan zir chu hnam inpumkhatna leh in­unauna ṭha thlen theitu a nih thu sawiin, "Hnam hmasawn apiangin an ṭobul leh an nihna an hre chiang a, Mizote pawhin he lam kawng kan hawi mek hi a lawm­awm hle a ni," a ti.

Lalrinliana Sailo chuan, mahni hnam nihna leh ṭawng ngaisang lo chu hnam dingchhuak an ni mawh hle tih sawiin, "Hnam dang ṭawng thiam chungin kan ṭawng hi kan zahpui tur a ni lo," a ti a; Mizo thawnthu leh hla hluite chu ngaihhlut thiam tur a pawimawh thu a sawi. Khawzawl College panna kawng sial thar chu kumin chhung ngeiin blacktop tur a nih thu sawiin, "Seminar rah chhuah a ni," a ti bawk.

Seminar-ah hian PUC-a Mizo department zirlai te, Khawzawl College zirlai, Khawzawla tlawmngai pawl hrang hrang aiawhte an tel a; Mizorama college hrang hrang pakua leh Mizoram University aṭangin paper 30 zirho a ni.