Union Minister-in Mizoram a rawn tlawh

Union minister of state for Micro, Small & Medium Enterprises Giriraj Singh chuan Mizoram a rawn tlawh a; chief minister Lal Thanhawla nen an inkawm bakah, thil siamna hmun ṭhenkhat a tlawh.

Giriraj Singh hian March 31, 2017 khan Ailawnga dragon fruit farm, SFURTI Cane & Bamboo Cluster leh Hnam Chhantu Pawl hmunte a tlawh a; Inrinni khan PMEGP ṭanpuina dawngtu zianga mi - VTR Computer Center, Teremi Ralte Tailoring leh COCO Cafe & Restaurant-te a tlawh bawk.

Ailawng rama dragon fruit farm a tlawhnaah Giriraj Singh chuan, dragon fruit chu ram dang aṭanga lak luh a nih avangin India ramah a to hle tih sawiin, Mizoram chu dragon fruit ṭhat duhna hmun a nih thu leh, a hralh chhuahna tur market ṭha a awm sa avangin a hlawhtlin a beisei thu a sawi.

Republic Venga Hnam Chhantu Pawl showroom a tlawhnaah Union Minister chuan, an thil siam chhuahte chu awmze nei zawka hralh theih ṭha a tih thu a sawi a; an thil siam chhuahna hmun tilian a, training centre-a hlan kai ni se a duh thu sawiin, mi 100 vel training theihna tura ruahman a nih theih nan project siam turin a ràwn a ni.

Giriraj Singh chuan, Mizoramah PMEGP hlawhtling taka kalpui a ni tih sawiin, PMEGP loan hlawhtlinpuitute chu an ṭhan zel theih nan kawng dappui a inhuam thu a sawi a, "State sorkar, KVIC leh bank-te'n sumdawnna tenau aṭanga bultan tumtute hlawhtlin nan nasa zawk leh inpawh zawka an thawhho a pawimawh," a ti.

Micro, Small & Medium Enterprises Minister hi Inrinni tlai khan CM Lal Thanhawla nen CM banglaah an inkâwm a; Union Minister chuan, Micro, Small & Medium Enterprises hmangin Mizoram dinhmun nasa taka siam danglam theiha a hriat thu a sawi.

Giriraj Singh chuan, thil siamna emaw, sawngbawlna emaw din duh, mimal mahni kea din tumte ṭanpui leh kawng kawhhmuh turin a Ministry-in district tinah incubation centre, cheng vaibelchhe khat zel hmanga din theih a nih thu sawiin, chu chu ngaihven turin Chief Minister a ngen.

Union Minister chuan, Mizorama aieng leh sawhthing thar chhuahte chu Manipur-a aieng leh sawhthing sawngbawlna angin Micro, Small & Medium Enterprises Ministry kaltlangin a tih ve theiha a rin thu sawiin, Manipur-a an tih dan zir tura mi tír turin CM a ngen. Mauin Mizoram hmél a tihdanglam theih a rin thu sawiin, "Mau hi sum thawh chhuahna mai ni lo, hna tam tak siamna hmanraw pawimawh tak a ni thei," a ti.

CM Lal Thanhawla chuan, Ministry of Micro, Small and Medium Enterprises hnuaia project tan sum pek dan (funding pattern) 80:20 chu Mizoram ang tlangram state tan a harsat thu sawiin, ennawn turin Union Minister a ngen a; Giriraj Singh chuan ennawn a tiam. Chief Minister chuan, handicraft leh handloom sector-te chu Micro, Small & Medium Enterprises Ministry kaltlanga tihchangtlun a ṭul thu a sawi bawk.