HPC sum bo a awm lo - Lunglei Congress

Lunglei District Congress Commi­ttee (LDCC) hruaitute chuan, MNF sub-headquarters, Lungleite'n kum 2009 aṭanga 2016 chhungin Lunglei High Powered Committee (HPC) sum Rs. 4,90,26,724.94 hmanna hmuh tur awm loa a bo thu an sawi chu an chháng a, "HPC sum bo a awm lo," an ti.

LDCC hruaitute chuan Inrinni khan Aizawl Press Club-ah thuthar thehdarhtute an kâwm a; an president C Lalhmingliana chuan, Lunglei MNF-te'n HPC sum Rs. 4,90,26,724.94 hman ralna hriat loh nia an sawi chu sawifiahin, "MNF-te'n RTI Act hmanga an zawhnaah kum 2009-2016 chhunga department hrang hranga sum pek chhuah zat, office expenditure leh medical reimbursement bill chauh an zawt a, salary, wages, traveling expenses, etc. atana sum hman an zâwt tel lo," a ti. An zawh tel lohte atan hian Rs. 4,62,04,717 hman a nih thu a sawi.

C Lalhmingliana chuan, HPC hnuaia kum 2010-11 chhunga utilization certifcate (UC) pek chhuah a nih theih loh chhan sawiin, "HPC sum hi K-Deposit-ah dah a nih avangin UC hi Accountant General, Aizawlah thawn vek a ni a, hei vang hian UC pek theih a ni lo. Kum 2015-16 a UC tlemtê chauh pek chhuah thei tia tarlan pawh, RTI zawhna dawn a nih hun lai leh chhanna buatsaih lai hian kum 2015-16 hna kalpui lai mek, la thawh zawh loh a nih avangin UC pek chhuah tam tur a la awm thei lo," an ti.

LDCC President chuan, HPC hian chhim lamah hmasawnna nasa tak a thlen nia sawiin, "Kum 2008 aṭangin hmasawnna hna hrang hrang a thawk a, hna 826 zet a thawk tawh. Dik tak leh ṭha takin hna an thawk a, sum bothlau cheng khat mah a awm lo. HPC hian chhim lam kan vuivaina a phuhru a ni," a ti a; HPC chhawrtu chu party mite chauh ni loin, zirlai leh tlawmngai pawlte pawh an nih thu a sawi.

Eptute aṭanga sawiselna a awmin an chhàn nghal ngawt ngai loh thu sawiin C Lalhmingliana chuan, "Tun ṭuma MNF-te'n an thusawi chungchang pawh uluk takin kan zir chiang a, thil nihna dik tak kan hmuh chhuah hnuah chauh thuthar theh­darhtute hmaa sawifiah turin kan lo kal a ni. Thil awm dan chiang takin kan hria a, MNF lamin ACB-a FIR an thehluhah pawh hi hlauh chhan tur a awmin kan hre lo," a ti.

HPC hnathawh LDCC sawifiah dan
1. Rs. 2,00,000 sênna anga tarlan Mamte ME School-III tih chu tihsual palh a ni a, Sangduna Middle School, Mamte tih zawk tur a ni. Vengchhaka sikul awm ṭhin veng thlanga sawnna atan sum hman a ni.
2. Ngaihsih approach road Rs. 25,00,000 sennaa tarlan chu a paltlang tur ram neitute aṭanga harsatna a awm avangin, sum hi Venghlun-Ṭhuamluaia Mual, Mualcheng South pawhna tur kawng siamna leh Saibuhchhuah kawng siamna atan hman a ni.
3. Rs. 29,93,000 senna Lunglei-Nghasih kawng chu siam ṭhat leh chei ṭhat a ni. Kawng hi black top a nih loh avangin ruahtuiin a khawrh leh ṭhin a, JCB inchhawp renga hna thawh a ni.
4. District Park, Zobawk quarters sak ngei a ni a, building hran sa loin, district park-a chowkidar quarters awm sa building ṭhiat loin sak zawm a ni.
5. Zobawk M/S bula pavement chu Rs. 12,00,000 senga siam ngei a ni a, ruahman aia thui thawh a ni.
6. Rs. 8,00,000 sênga Lunglei DC staff quarters pahnih sak tura tih chu building pahnih sakna atan sum a tam loh avangin, department-in remchang a tih danin pakhat sak a ni.
7. Lunglei DC staff quarters sakna atana Rs. 20,25,000 ruahman chu building pathum sak theih a nih loh avangin department-in remchang zawk a tih angin building pakhat, mi pathum luah theih tura sak a ni.
8. Rs. 10,00,000 senga Thingfala water reservoir siam tura tih chu PHE lamin a siamna hmun tur an hmuh loh avangin Thingfal VCP ngennain an khaw field laihna atana hman a ni.
9. Hnahthiala ADHO quarters Rs. 5,00,000-a sak tura tih chu department-in pawimawh zawka an hriat vangin Lunglei ADHO quarters sakna atan hman a ni.
10. Rs. 2,00,000 senga Nunsury-a guest house sak tura tih chu bialtu MLA hriatpuina toilet-cum-bathroom siamna atan hman a ni.
11. Uksasury-a khelmual siamna atana Rs. 2,00,000 ruahman chu khelmual siamna atan hman a ni.
12. Puankhai football playground tihzauhna atana ruahman Rs. 2,00,000 chu a nihna tur anga hman a ni.
13. Rs. 2,00,000 senga Lunglei Venghluna retaining wall siam tura tih chu siam ngei a ni.
14. Sertlangpui leh Mualṭhuam inkara Tlawng lei chu Rs. 1,50,000 hmanga thawm ṭhat ngei a ni a, hnathawhna a rei tawh bakah sum a tam lo.