MNF-in Zodintluanga báng turin an phût
MNF Legal Board-te chuan, M/s Mizo Carbon Product-te'n dan dik loa central subisidy an hmuh theih chhanah minister Zodintluanga chu inrawlhah an puh a, báng turin an phût.
MNF Legal Board hruaitute hian Inrinni khan Aizawl Press Club-ah thuthar thehdarhtute an kâwm a; an chairman J Lalremruata chuan, Taxation minister Lalsawta'n Assembly House a hrilh danin, Mizo Carbon Product chu Dr Margaret M Varte ta a ni tih sawiin, "Dr Margaret M Varte hi transaction an khawih tak tak lai nia lang kum 2012-2013 a Taxation minister Zodintluanga nupui laizáwn a ni," a ti.
J Lalremruata chuan, Mizo Carbon Product-te'n hna an thawh hun lai leh way bill (lem) an siam hun pawh Zodintluanga'n Taxation department a enkawl lai nia sawiin, "Dâwta sum siamnaah Zodintluanga hi a inrawlh thûk hleah MNF chuan kan ngai," a ti.
Mizo Caron Product-te'n thil tih dan chu eirukna lian tham sawi hlawh tak a nia sawiin, Zodintluanga chu a báng dawn nge, Chief Minister-in a bàn dawn tih an thlìr mek thu a sawi.
Zawhna chhangin J Lalremruata chuan, Mizo Carbon Product thil tihah Zodintluanga a inrawlh ngei tih finfiahna an nei lo tih a sawi a, "Finfiahna nei lo mah ila, department-te hian hotu lam aṭanga nawrna a awm a nih loh chuan way bill lem hi an pek ngam kan ring lo," a ti.
J Lalremruata sawi danin, Mizo Carbon Products hian Luangmuala Industrial Growth Center-ah hmunhma chhetê neiin, lungalhthei thlitfimna an din a; a tìra a neitu nia lang chu Margaret M Varte, Ravi Gulgulia leh Yash Infrastructure Pvt. Ltd., Guwahati-te an ni. Taxation department minister Lalsawta'n Assembly a hrilh danah erawh chuan a neitu chu Dr Margaret M Varte a ni.
Mizo Carbon hian kum 2012-13 chhung khan lungalhthei truck trip 2,382 phur thleng angin an insawi a, subsidy uchuak taka dilin Rs. 3,41,65,086 chu State Level Committee (SLC)-in May 21, 2013-a a pawmpui angin an dawng. A hnua an dil leh Rs. 10,34,82,311 chu SLC hian May 27, 2016 khan a pawmpui leh a, dodalna a nasat tak avangin meeting minute an tichhuak ta lo thung.
Lungalhthei truck phur 2,382 an phur thleng lo tih chu an hnathawhna hmun, Industrial Growth Center, Luangmualah hmuh theihin a awm reng niin an sawi a; way bill-ah chuan ni khat chhungin km. 300 chuang aṭangin vawi hnih, vawi thum, vawi li leh vawi ruk lai phur thleng angin a lang tih an sawi bawk.
MNF party chuan, January 26-28, 2017 khan lungalthei an lakna hmun nia sawi chu an zir chiang a, a ṭul angte an zawtfiah tih an sawi. Lungalhthei lakna hmun nia sawi hi Khleiriat, Meghalaya-a lungalhthei chhêk khâwlna hmunte a ni.
Lungalhthei an lakna nia an sawi firm ṭhenkhat chu - SA Sangma Coal Agency, Gulab Chand Jain, SJ Enterprise, North East Traders leh HK Coal Agencies te a ni a; heng firm-te hian Khleiriat-ah site office emaw, delivery station emaw an nei lo tih kum 20 chuang lungalhthei hmanga sumdawng tawh headman Niwel Lyngdoh chuan a sawi tih an tarlang.
Mizo Carbon Product chhui mektu Anti Corruption Bureau chu an ring ngam lo tih sawiin J Lalremruata chuan, "Chief Secretary thupek meuha chhui siin, kum khat dáwnah pawh an chhui zo thei lo. ACB-te hi an kut mai ni lo, an ke thlengin phuar an ni," a ti.
MNF Legal Board hruaitute chuan, minister Zodintluanga chu a báng lo a nih chuan hmalak zel dan turah ruahmanna engkim an siam lâwk tawh a, mahse, an puang chhuak duh rih lo tih an sawi.