KHAWTHLIR

Hmun hlui Humhalh
Art & Culture department aṭanga thu dawn danin, Mizoram Ancient Monuments and Archaeological Sites & Remains Act, 2011 hmangin historical/archaeological site 79 chu State Protected Monument-ah puan a ni tawh. Heng hnam rohlute hi December 29, 2008 aṭangin dan mumal tak hmanga enkawl a ni.

Consultancy firm
Mizoram sorkar chuan tun dinhmunah consultancy firm 46 an ruai mek a, chu'ng zinga 26 chuan work contract an thawk. Consultancy firm-te kutah hian work contract kal lai Rs. 2,81,93,59,491 a awm mek a ni.

Thisen pe
Inrinni khan Salvation Army India Eastern Territory kum 100 tlin lawm nan SAY Council, Aizawl chuan Aizawl Civil Hospital tan thisen unit 72 an pe, a petute mipa 64 leh hmeichhia 8 an ni. Kolasib-a SAY member-te'n Kolasib District Hospital tan unit 30 an pe a; Champhai area SAY-te'n Champhai damdawi-in tan unit an pe bawk. Ramhlun North Vengthlang Branch KṬP chuan an kum 16 tlin pualin ACH tan thisen unit 35 an pe a, a petute mipa 26 leh hmeichhia pakua an ni.

Bial zaipawl meet
Baptist Church of Mizoram (BCM) hnuaia Worship & Music Committee chuan, Inrinni leh nimin khan Lunglei Ramthar BCM biak-inah Lunglei khawpui chhunga pastor bial zaipawl intawh khawmna, Lunglei Town Bial Zaipawl Meet an buatsaih a, thupui chu 'Mi dik tan chuan Pathian fak hi a âwm rêng a ni’ tih a ni.

Grade B++ hmu
NAAC chuan Lunglei College chu an peer team-in an endik hnuah grade B++ a pe thar. Lunglei College principal Lal-hmangaihi Hrahsel chuan, an college-in grade B++ an hmu ta chu lawmawm a tih thu sawiin, college-a thawkte leh Alumni Association-te thawhhona leh ṭanrual ṭhat vang a nih thu a sawi.

Lusún khawhar
Thenzawl Today editor PC Zonunsanga (52) chu April 1, 2017 zan dar 6:30 vel khan State Referral Hospital, Falkawnah a thi a, nimin khan Thenzawla an inah vui a ni. MJA general headquarters leh district MJA hrang hrangte chuan PC Zonunsanga uina thu an chhuah.