Lamlian atanga metre 500 aia hnaiah Zu zawrh phal loh vangin zu dawr 12 khâr

Supreme Court thupek, national highway leh state highway kawngpui aṭanga metre 500 aia hnaia zu dawr hawn phal lohna chu April 1, 2017, Inrinni aṭang khan Mizoramah pawh hman a ni a; lamlian aṭanga metre 500 aia hnaia awm zu dawr 12 khâr a ni.

Aizawl district-a Excise & Narcotics superentendent Z Lalhmangaiha'n zawhna chhanga a sawi danin, Supreme Court thupek hman a nih tâk avang hian Aizawl khawpui chhung bika zu dawr 34 zinga 12 chu national highway leh state highway aṭanga metre 500 aia hnaia awm a nih avangin April 1 zing khan Excise & narcotics department-in an kalhsak.

Dawr kalhsak an nih bakah, zu zawrh phalna (licence)-te pawh tihtawp lailâwk vek a ni a; danin a phal chin, kawngpui aṭanga metre 500 aia hlaa dawr an hawn theih chuan an licence chu tihnun leh nghal theih a ni thung.

Hetih lai hian, Aizawl By-Pass Road, Falkland Veng leh Melthum dáia Zampuimanga lungphun inkar chu city road-a puan a nih avangin he kawngpui kama zu dawr­te chu kharsak an ni lo. Lungleiah pawh, Hrangchalkawn aṭanga Zotlang thleng chu city road-a puan a nih avangin a bul hnaia zu dawrte khâr a ni lo bawk.

Assembly budget session neih zawh taka Excise & Narcotics minister R Lalzirliana'n a tarlan danin, Mizoram Liquor (Prohibition and Control) Act hnuaiah Mizoram pumah zu lei phalna mi 71,230 pek an ni tawh. Aizawl Municipal Corporation chhung bikah zu dawr hawn phalna - retail sale of liquor 39 leh retail sale for consumption on premises pahnih, a vaiin mi 41 hnenah dawr hawn phalna pek tawh a ni.

Lamlian kama zu dawr siam chung­changah hian Harman Singh Sadhu, Chandigarh chuan kawngpui a him zawk nan leh lirtheia chetsualna a tlem zawk nan Supreme Court-ah ngenna a thehlut a; Supreme Court chuan December 15, 2016 khan thupek chhuahin, kawngpui aṭanga metre 500 aia hnaiah zu zawrh leh zu fakna lam reng reng siam emaw a khap a ni.

Supreme Court thupek hi April 1, 2017-a hman ṭan tura tih a nih angin hman ṭan a ni a, state tinah hman tur a ni. SC khapna thupek hian zu dawr bakah, hotel leh thingpui dawr, zu zuar ṭhinte pawh a huam vek a; state tina Excise department-te thupek hi khauh taka kengkawh tura hriattir an ni.