Fate hnathawh chin hre turin ngen

Chennai Mizo Welfare Association (CMWA) chuan thuchhuah siamin, Chennai leh a chhehvel­ah Mizo hnathawk an pun zel thu an tarlang a; hnathawka awm chhung­te chu an fate/chhungte hna thawhna chin leh khawsak dan mumal taka hre turin an ngen.

CMWA tarlan danin, tun hnaiah Chennai leh a chhehvela hnathawk ṭhenkhat, a bikin spa/massage parlour-a thawk zingah buaina nei an awm a, police man hial tâwk pawh an awm. Police-in an mante chu Immoral Trafficking Prevention Act 1956 hnuaiah thubuai ziah luh an ni a, nawhchizawrh tirna thubuai hmangin man ṭhin an ni.

Police-in an mante chu Vigilance Home-ah dah an ni a, judicial magistrate phalna lo chuan lak chhuah theih an ni lo. La chhuak tur chuan an chhungte ngei, identification document mumal tak nen judicial court-ah an inlan a ngaih avangin CMWA tan buaipui a harsa tih an tarlang.

Police man tâwkte hian Mizote an timualpho a, harsatna tam tak an thlen tih sawiin CMWA chuan, "Kan fate emaw, kan chhungte emaw, Chennai khawpui leh a chhehvela hna thawka awm an awm a nih chuan an thawhna chin leh an khawsak dan mumal tak hre turin kan inngen a ni," an ti.

CMWA chuan, parlour-a thawh tum/turte chuan training-na certificate mumal tak neih ngei ṭha an tih thu tarlangin, "Certificate tel loa thawh theihnaah chuan thawk lo turin kan inngen. An thawhna turte'n registration/license fel tak an neih leh neih loh fiah hmasak ṭhin ni se," an ti a; phaia hna thawk turin ruih theih thila fihlim lo leh nungchang ṭha lote chu tirh loh ni se an duh thu an sawi bawk.