Baptist House-a awmte thiar chhuak

Nimin zing khan MG Road, Aizawla Baptist House thlangah lei a min a; hlauhthawnawma ngaih a nih avangin Baptist House chu tiruak nghal turin sorkarin a hriattir a, nimin khan bungruate thiar chhuah nghal a ni.

MG Road-a Bible House dinna lei a tlahniam zel a, tun hnai khan Baptist House-a hmun ṭhenkhat pawh a khi tawh tih hmuh a ni. Chumi hnuah, nimin khan Baptist House thlangah nimin khan lei a min leh bawk. Hengte avang hian Baptist House pawh a him loa ngaih a ni.

Aizawl District Disaster Ma­nage­ment Authority (ADDMA) chairman Kannan Gopinathan, Aizawl DC chuan nimin khan thu­pek chhuahin, Baptist House chu a rang thei ang bera tiruak turin a hriattir a; ADDMA-a zonal officer-te pawh enpui nghal turin a hriattir.

Thupekah chuan, Baptist House thlanga Khatla North Presbyterian Kohhran biak-in zauh hna pawh chawlhsan rih tura tih a ni a; MG Road-ah lirthei, two wheeler bak tlân phal a nih loh thu puan a nih bakah, Bible House leh Baptist House-a hrui (cable) hrang hrangte pawh hlip nghal tura tih a ni bawk.

ADDMA Chairman thuchhuak angin, Baptist House bungruate chu nimin khan a remchan dan angin thiar chhuah ṭan nghal a ni a, a chhunga chengte pawh nizan khan hmun dangah an riak chhuak a, an awm zuina tur chu BCM hruaitute'n ngaihtuahin an ruahman nghal.

Nimina Baptist House-a BCM hruaitute ṭhukhawm chuan, BCM Executive Secretary office leh Baptist Bookroom chu BCM Chanmari biak-in hnuai hall-ah sawn turin an rel a; building-a cheng chhungkuate insawnna tur pawh an siamrem nghal a ni.