Ka CM leh chuan a lêt tam takin Ka thiam tawh ang - Zoramthanga

Mizo Students' Union (MSU) hruaitu hlui eng emaw zatin MNF party an zawm a, nimin khan MNF president Zoramthanga'n Mizo Hnam Rûnah a lawm lut. Zoramthanga chuan, Chief Minister a nih leh chuan a CM hmasak lai aiin a lêt tam taka a thiam tawh tur thu a sawi.

MNF President chuan, kum 1998-2008 chhunga an sorkar chu Pathianin 'aite chhin' nan a hmang tih sawiin, "Kha tih lai khan kan la thiam loin, kei ngei pawh tun dinhmunte ngaihtuah chuan ka thiam lo hle. Kum 10 inzirna hun Pathianin min pek chhung hian ka inzir thiam tawh hle a, ka CM leh chuan a let tam takin ka thiam tawh ang," a ti a; Pathian leh mipui zarah an sorkar leh ngei dawn niin a sawi.

Tun hnaia CM Lal Than­hawla'n police-te an fit tur a ni tih a sawi chu chhangin Zorama chuan, "Zu zémpui ṭhutchilh chung chuan police-te hi an fit har hle a ni. Kum hnih pawh tling loah zu avangin police 341 an thi tawh a, civil mi pawh 3,000 - 4,000 vel an thi tawh a ni," a ti.

Zoramthanga chuan, minister R Lalzirliana'n zu zawrh chu ṭha an tih ngai loh thu a sawi laiin, zu zawrh ṭhat leh ṭhat loh sawiseltu pastor leh kohhran upate hming Congress Bhavan-a pe turin an ti niin a sawi a, "Zu zawrh sawiseltu sorkar hnathawkte chu thingtlang hmun hláah an sawn a, zu chhia tia thehdarhtute pawh jail bang an zûttir a ni," a ti a; tun hnaia MKHC thuchhuah chu an sorkar lai chu ni se, tla turah an inngaih phah ngei tur thu a sawi.

MNF chu hnam rilru pu, Mizo nationalism keng­kawhtute an nia sawiin Zorama chuan, Mizo ram leh hnam vawnhim chu an tih ngei tur a ni tih sawiin, "Vai huat ringawt hi hnama chianna a ni lo a, Mizo nationalism vawn nun zel hi kan bat chu a ni. Mizo hnam dam khawchhuahna tura inven hi Mizo nnam nationalism kan tih chu a ni," a ti.

MNF thuchhuah tarlan danin, MNF-a an lawm luh tharte hi zirlai pawl hruaitu hlui mi 36 an ni a; chung zingah chuan MSU president hlui Zodinpuia telin, lawm luhte aiawhin thu a sawi a ni.