KHAWTHLIR

Award dawng
Mizoram Forensic Science Laboratory chuan March 30-31, 2017 chhunga Haryana-a ‘XVIII All India Conference of Directors of Fingerprints Bureaux’ neihah thubuai chhui chhuah kawnga thawh ṭhat lawmman, Excellence Award an dawng. Award hian Rs. 7,500 leh thuchei a keng a, Mizoram FSL director H Sangchungnunga hnenah hlan a ni.

Book of the Year top 3
Mizo Acedemy of Letters (MAL) chuan kum 2016 chhunga Mizo ir-áwm chhuak lehkhabu ṭha ber, Book of the Year an thlan turah a ṭha zual pathum an thlang chhuak. Book of the Year top 3-te chu - Lalhruaitluanga Chawngte ziah 'Aizawlah Aizawler' tih te, PC Lawmkunga ziah 'Ka dai ve chin' tih leh, Anthony Vanlalrawna ziah 'Thanpuii thlân' tihte a ni. Lehkhabu pathum aṭangin Book of the Year an thlang leh ang.

Thisen pe
Sairang Dinthar Bial KṬP-te chuan nimin khan blood donation camp an huaihawt a, Synod Hospital tan thisen unit 30 an pe.

In kâng
Nimin tlai khan Zemabawk Mel-4 Mualah Lalṭhuami in, Assam type chhâwng hnih chu bungraw chuh hman lohin a kâng ral. In kan lai hian ruah a sûr avangin a kâng tih an hre lawk lo a, in awmna a fâl deuh bawk avangin, a kâng tih an hriat chuan ṭhelh theih lohin a kâng nasa tawh a ni. In kan chhan hriat a ni lo.

In chhia
Pathianni tlaia thlipui leh ruah sur avang khan Champhai district-a Khawkawn khuaah in chhia a awm nual a, in chhiate hi khawtlang mipuiin an senghawi a ni. Thudawn danin, in chhe zingah hian chenna-in pahnih leh sub centre-te chu luah zui tlak an ni lo.

Zirna-in zat
Tun dinhmunah Mizoram chhungah higher secondary school, science zir theihna 44 leh commerce zir theihna 18 a awm mek a ni. Mizoram sorkar chuan commerce leh science zir theihna hawn belh a tum hrih lo nia thudawn a ni.