Kum 5 chhungin ram kang venna atan Sorkarin cheng nuai 1081.94 a seng

Mizoram sorkar chuan kum nga chhung (2011-2016) chhung khan ram kan venna atan cheng nuai 1081.94 an seng ral.

Environment & Forest dept. chhin chhiah danin ram kan venna atan hian 2011-2012 ah cheng nuai 106.22, 2012-2013 ah cheng nuai 331.10, 2013-2014 ah nuai 196.52 leh 2015-2016 ah nuai 94.424 sen a ni.

Forest dept. tarlan danin, kangmei venna atan hian kangmei chhuah hlauhawmna bik leh plantation fire line siam a ni a, kangmei chhuah theih laiin fire watcher-te rawih ṭhin niin, awarness campaign state level, district level, village level-ahte neih ṭhin a nih bakah YMA khawmpui leh kohhran hrang hrangahte pawh neih ṭhin a ni.

Heng bakah hian ram kang venna kawnga hmalakna atan State Level Fire Prevention Committee din a ni a, an hnathawh chu kangmei chhuak lo tura policy fel tak neih te, lohal laia ram a kan lohna atana enpuitu siam te, district level committee tih tur duan leh an hnathawh enpuite a ni.

Hetihlai hian, Mizoram sorkar chuan kum 2001 aṭang khan Mizoram pumah lo hal hun hnuhnung a bituk ṭan a, sorkar thuzawm lo mi 155 chu Court-in thiam loh a chantir tawh a, thubuai kal lai mek pakhat a awm.

Forest dept. chhin chhiah danin, Mamit Division huam chhungah lo hal hun bituk zawm lo mi 155 te chu thiam loh chan tir an ni a, Rs. 200 ṭheuh an chawi a, mi pathum erawhin thiam an chang thung. N Vanlaiphal Division huam chhungah pawh hun bituka lo hal loh thubuai kal lai mek pakhat a awm a ni.

Mizoram sorkar hian lo hal hun hnung atan kumin hian March 15 a ruat a, mahse khaw awm danin zir loh avangin pawhsei niin, district hrang hranga lohal hun hnu­hnung atana bituk a in ang lo.