Kawlphetha la siam chhuah loh chhanah MPC-in Hawla leh Zorama an puh
MPC party chuan thuchhuah siamin, Mizoramin kawlphetha siam chhuah mumal tun thlenga sawi tur a la nei lo chu chief minister ni tawh pahnih - Lal Thanhawla leh Zoramthanga te sorkar chhunga hmalakna an neih loh vang leh a ngaihna an hriat loh vang niin an tarlang.
MPC chuan, CM Lal Thanhawla’n Mizoramin kawlphetha a mamawh sàn lai ber (peak load) laiin state páwn aṭangin kawlphetha megawatt 96 lei a ngaih ṭhin thu a sawi leh sorkar kum liam ta 2015-16 chhungin Mizoram sorkarin kawlphetha leina atan cheng vbc. 210 a hman thu a sawi chuan kawlphethaa Mizoram pachhiatzia a tilang tih an sawi a, "Hetiang dinhmuna ding la nih reng hi kan state mualphona lian takah kan ngai," an ti.
MPC chuan, "Mizoram ṭhenawm state-te'n hnianghnar taka kawlphetha an neih tawh laia Mizoramin chaurau êk a la thai fo mai hi ram hmasawnna kawnga ke min pênpuitu hruaitu, ram hmangaihtu tak tak kan la neih loh vang a ni," an ti a; MPC party leh a ṭanrualpuite'n sorkar thar an siam veleh hnianghnar taka hman tur kawlphetha an buaipui tur thu sawiin, Mizoram mipuite ṭawiawmna an ngen a ni.