Khaw 34-ah kawlphetha la pe lo

Mizorama khaw 34-ah tun dinhmunah kawlphetha pek a la ni lo a, Aizawl leh Champhai district-ah chuan kawlphetha pek lohna khua a awm tawh lo.

Power & Electricity department hotute hnen aṭanga thu dawn danin, kawlphetha la pek lohna khaw 34 zinga 22 chu Rajiv Gandhi Grameen Vidyutakaran Yojana (RGGVY) scheme hnuaia pek tum an ni a, harsatna hrang hrang vangin pek theih a la ni lo.

Khaw dang 12 chu kum 2011 chhiarpuia village council thar siam chauh an nih avangin RGGVY thawh laiin huam tel hman a ni lo a; Deen Dayal Upadhyaya Gram Jyoti Yojana scheme hnuaiah pek tum a ni.

Eng pek lohna khuate hi Lawngtlai district-ah 15, Lunglei district-ah 11, Mamit district-ah pali, Siaha district-ah pahnih, Serchhip district leh Kolasib district-ah pakhat ve ve a ni.