Grape wine tihralna dan a awm lo ; Excise-in an mante an la kawl ṭha

Excise & Narcotics department (END) staff-te'n tun hnaiah grape wine eng emaw zat man mah se, a tihralna tur dan Mizoram sorkarin a nei lo. Grape wine mante chu END chuan an la kawl ṭha a ni.

Vanglaini thu dawn danin, March 25, 2022-a chief minister Zoramthanga hoa council of minister ṭhukhawmin, END aṭanga zu khapna kalpuina tura duan, Mizoram Liquor (Prohibition) Draft Rules, 2022 rawtna an pawm. END-in MLP Draft Rules, 2022 a thehluhah chuan zu leh a kaihhnawih hrim hrim khap ṭha tih a ni.

Hetih lai hian, council of minister-in an pawm tâk Mizoram Liquor (Prohibition) Draft Rules, 2022 chu government gazetted-ah chhuah a la ni lo a, chuvang chuan Rules chu hman theih a ni lo. Tun dinhmunah Mizoram sorkarin grape wine an mante tihralna tur dan a nei lo a, MLP Rules pawm tak chu gazetted-a chhuah a nih hunah chuan dan hnuaiah tihral theih a ni ang.

END enforcement-te chuan May 27, 2022-a Millennium Centre leh Aizawl hmun ṭhenkhata grape wine leh wine dang an mante chu an la kawl a, an tih zel dan tur hriat a la ni lo.

Tarlan tawh angin, Millennium Centre Dawrkai Association (MCDA) chuan thuchhuah siamin, Millennium Centre-a wine mante chu a neitute hnenah pe lêt tur leh an pe lêt lo a nih chuan zangnadawmna pe turin Mizoram sorkar an phût.

Hetih lai hian, wine an man sak neitute chuan sorkar aṭangin thu dawn an la nei lo a; wine neitute chu END chuan Rs 3,000 ṭheuh an chawitir a ni.