1 Mizo Air Squadron NCC-in Cultural Night an hmang

1 Mizo Air Squadron NCC Combined Annual Training Camp nei mekte chuan June 15, Nilaini khan State Training Centre, Tanhrilah Cultural Night leh Camp Fire an buatsaih a, Sports and Youth Services minister Robert Romawia Royte-in a hmanpui.

Robert Romawia Royte chuan, Camp Fire chhimtu cadet-te chu vannei a tih thu sawiin, "Covid-19 avanga kum hnih chhung ngawt camp neih theih a nih loh hnua hun ṭha a inher chhuak leh ta hi a lawmawm hle a ni," a ti a; cadet-te chu an camp chhunga an thil zirte hre reng a, an hma hunah ṭangkai taka hmang turin a chah.

Sports Minister chuan, Mizoram chhim lama district pali huam turin Lungleiah 2 Mizo Battalion NCC din a nih dawn thu sawiin, Cabinet-in a pawm vek tawh thu leh July 2022-ah kalpui ṭan tura ruahman a nih thu a sawi a; social media hman kawngah fimkhur turin zirlaite chu a chah bawk.

Cultural Night-ah hian NCC cadet-te'n hnam làm chi hrang hrang leh an thiamthilte an entir a, an camp chhunga an thil zirte pholanna hun an hmang bawk. Combined Annual Training Camp-a tel sikul leh college zawng zawngin Sports Minister hnen aṭangin infiamna hmanrua an dawng vek a ni.