CM hoin AR insawn dan tur sawiho
Nimin khan chief minister Zoramthanga hoin CMO conference hall-ah Mizoram sorkar hotute leh Assam Rifles hotute'n Aizawl khawpui laili aṭanga Zokhawsanga Assam Rifles insawn chungchanga thil pawimawhte an sawiho.
Sorkar thuchhuah tarlan danin, kum 2019-a Ministry of Home Affairs (MHA)-in Assam Rifles insawn thuai tura lehkha a rawn thawn tawh hnua ṭhenkhat chauh an la insawn leh Assam Rifles lamin hun tiam an bawhpelh nasat lutuk chungchang sawiho a ni.
Zokhawsanga hmunhma cheibàwlnaah Mizoram sorkarin a tih tur angte a tih tawh thu leh, infrastructure chungchanga bawhzui ngai ṭhenkhat an thlente pawh chak taka bawhzui thuai a nih zel tur sawi a ni a; Assam Rifles-te chu an la insawn theih lohna chhan sawiho a, rang taka hma la tura tih an ni.
Tun hnaia deputy chief minister Tawnluia'n Ministry of Home Affairs hotute hnena AR-te insawn tur chungchang a thlen thu sawi chhuah a ni a, sorkar laipui aṭangin Mizorama rawn kal tur an awm thu tarlan a ni.
Ṭhutkhawmah hian Mizoram sorkar aṭangin deputy chief minister Tawnluia, Home minister Lalchamliana, Land Revenue & Settlement minister Lalruatkima leh a kaihhnawih sorkar official-te an tel a; Assam Rifles aṭangin 23 Sector DIG Brig. Digvijay Singh leh officer dangte an tel.