CM hoin Health dept. an ṭhukhawm

Nimin khan chief minister Zoramthanga hoin CMO conference hall-ah Health department hotute an ṭhukhawm a, Zoram Medical College (ZMC) leh department hnuaia hmalakna turte an sawiho a ni.

Meeting-ah hian centrally funded medical institute hrang hrang an zirchianna chhawpchhuakin, ZMC chu JIPMER model emaw Regional Institute Model anga kalpui ṭha dawn nia an hriat thu sawi a ni. JIPMER model ah hian host state tan seat 30%, a bak 70% central government pool chu seat insem dan a ni a, Regional Institute Model (NEIGHRIMS, RIMS) ah chuan college awmna host state in 30% seat changin, central pool 15%, North-eastern region tan 55% a ni thung.

ZMC-a zirtirna a ṭan thu leh, zirlaite pawh an ṭhat thu sawilan niin, 100% central funding hmuh a, facility ṭha zawk pek a nih theih chuan India rama medical college ṭha pawlah la inhlangkai thei ngei tura an beisei thu department hotulute chuan an sawi a ni.

Meeting-ah hian Health department official-te chu an minister Dr R Lalthangliana leh Health & Family Welfare Boad vice chairman Dr ZR Thiamsanga, MLA ten an ho a ni.