Kolasib-ah kawṭhalo do dan tur sawiho

Kolasib District Steering Committee on Intensified Diarrhoea Control Fortnight chu nimin khan chief medical officer Dr Lalawmpuia Chhangte hoin a pisaah an ṭhukhawm a; June 23, 2022 aṭanga naupang kawṭhalo dona beihpui thlâk tura hmalak dan tur an sawiho. Naupang kum nga chin hnuai lam 9,063 hnenah ORS sem tum a ni.

Dr Lalawmpuia Chhangte chuan, kawṭhalo chu natna hrik chi hrang hrang vanga thleng thei a nih thu sawiin, "Kum naupang zawkte hriselna a nghawng na ṭhin a, a hun taka damdawi nena enkawl a nih loh chuan nunna chàn theihna a ni," a ti a; Oral Rehydration Solution (ORS) leh Zinc hmanga enkawl dam theih a nih thu a sawi.

Kawṭhalo laka mi tin himna atan taksa, ei tur leh tui thianghlim hman a pawimawh thu sawiin Dr Lalawmpuia chuan, kawṭhalo laka mipui him theih nan invawng thianghlim tura tih tur awmte leh ORS hmanga kawṭhalo enkawl dam theih a ni tih inzirtirna chu Intensified Diarrhoea Control Fortnight chhungin Kolasib District Hospital leh district chhunga primary health centre leh community health centre-ahte uar zawka kalpui tur a nih thu a sawi bawk.

Intensified Diarrhoea Control Fortnight chhung hian khua/veng tina accredited social health activist-te'n naupang kum nga chinte hnenah ORS báwm hnih an sem dawn a; PHC leh CHC tinah ORS-Zinc Corner buatsaih a ni ang.