Zirtirtu sawn vangin lungawi lo

Mizo Students’ Union (MSU), Meidum Branch chuan, Meidum Primary School-ah zirtirtu an indaih loh em em laia zirtirtu pakhat (a ngheta thawk) tun hnaia sawn chhuah a ni chu hriatthiam har an tih thu leh sorkar thil tih dan an dem thu an tarlang. Transfer order sût emaw, aiawh tur regular teacher dah turin sorkar an phût.

Meidum MSU tarlan danin, Meidum P/S-ah hian zirlai 85 an awm a, zirtirtu pathum awmin, a ngheta thawk pakhat leh a nghet loa thawk (MR teacher) pahnih an ni. Chutih laiin, a ngheta thawk awm chhun chu tun hnaiah sawn chhuah a ni a, an sawnna hmun Kolkasib Venglai P/S-3 ah chuan zirtirtu pasarih (headmaster, regular teacher 4 leh MR teacher 2) an awm sa a, zirlai 32 chiah an nei bawk a ni.

Meidum P/S-ah hun eng emaw chen aṭangin headmaster an nei tawh lo tih sawiin Meidum MSU chuan, “Zirlai leh zirna nasa takin a nghawng thei tih hriaa tuna transfer order hi cancel turin sorkar kan ngen a, June 20, 2022 ral hma ngeia transfer order cancel lo emaw, a aiawh regular teacher min dahsak lo a nih chuan na zawkin hma kan la ang,” an ti.