Chhanchhuah hna thawh dan inzirtir

Champhai District Disaster Management Authority (DDMA) chuan nimin khan Champhai College Adventure Club member-te pualin First Responders Training an buatsaih a, DDMA chairman James Lalrinchhana, district bawrhsapin a hmanpui.

James Lalrinchhana chuan, chhiatna thleng thei laka chêt lak dan tur inzirtirna chuan rah ṭha a chhuah ngei a beisei thu sawiin, “Chhiat tawhna hmun thleng hmasa tura beiseite chu mi nunna chhan tura huaisen leh tlawmngai tur te, mi dangte puih duhna thinlung leh sipai rilru put a pawimawh. Minute rei lo te chhungin nunna chhan leh chàn theih a nih avangin first responder-te’n thiamna in neih a ṭul,” a ti a; district chhung khua leh veng hrang hrangah inzirtir zel a ngaih thu a sawi.

Training-ah hian DMR distirct organiser VL Hruaimawia, medical officer Dr RE Lalremruata leh Fire and Emergency Services station officer F Lalchhandama ten chhanchhuah hna thawh dante an zirtir. Training hi vawiinah chhunzawm tur a ni a, State Disaster Response Force leh 2nd IR Battalion, Khawzawlte’n thil pawimawhte an zirtir ve leh dawn a ni.