Serlui-B Hydro Electric Project atan Environmental & Forest clearance la hmu lo

Serlui-B Hydro Electric Power (HEP) Project atan Mizoram sorkarin forest clearance leh environmental clearance a la hmu lo. Hetih lai hian, Serlui-B HEP atan hian cheng vbc. 203.04 vel sên a ni tawh.

Power & Electricity department hotute hnen aṭanga thu dawn danin, a thuphung chuan Serlui-B HEP atan hian March 13, 1990 khan enironmental clearance hmuh a ni a, March 26, 1991-ah forest clearance hmuh a ni. Kum nga chhunga hna ṭan a nih loh avangin forest clearance chu dil ṭhat leh a ngai a, July 2012-ah dil ni mah se, ministry aṭangin chhànna hmuh a la ni lo.

A thuphunga environment clearance leh forest clearance hmuh tawhah hian kawlphetha siam chhuah (megawatt) zat tur tarlan a la ni lo. Hetih lai hian, tuna project cost ang chuan unit khat man Rs. 4.33 vel a ni.

Serlui-B HEP hi kawlphetha megawatt 12 pe chhuak thei tura ruahman a ni a, December 12, 2013-ah contract agreement ziah niin, October 2004-ah hna thawh ṭan a ni. Project atana sum ruahman (estimate) chu cheng vbc. 41.57 a ni a, project tàwpsan lailawk a nih hmain vbc. 5 sen hman a ni. Project tharthawh lehna atan megawatt 12 pe chhuak thei tur thoa DPR siam leh a ni.

DPR thar hi Cabinet chuan February 15, 1999-ah an pawm a, tun thlengin he project atan hian cheng vbc. 203.04 vel sen a ni tawh. Kum 2012-2016 chhung bikah Serlui-B HEP chei ṭhat leh siamna atan cheng vbc. 17.50 hman a ni.

Serlui-B HEP hian February 2017 thlengin power mega unit 176 (gross) a pe chhuah tawh. Tun dinhmunah khawl pahnih a ṭha a, megawatt 8 a pe chhuak mek. Khawl pathumna pawh hna thawk thei tura peih a ni tawh bawk.

Power & Electricity department hotute chuan, Serlui-B HEP chu official-a hawn (commission) a nih theihna atan theihtawp chhuaha hma an lak mek thu an sawi.