Governor-in NEC pisa a tlawh Official-te nen an inkawm

Governor Lt.Gen. Nirbhay Sharma chuan Thawhṭanni khan Shillong-a North Eastern Council (NEC) pisa a tlawh a; amah lo dawngsawngtu NEC secretary Ram Mui­vah leh official-te nen NEC hnuaia ruahmanna kalpui mekte an sawiho.

Larsap chuan, NEC leh DoNER hnathawh dan chu a hrang hlaka kalpui a finthlak zawka a rin thu sawiin, "Tuna NEC leh DoNER hmalaknaah hian ruahmanna inang deuh deuh a tam a, kalpui dan tur leh hna vil chung­changah a hma aia uluk a ṭul. Tribal area, a bik takin autonomous district council area-te chu NEC hian a ngaihthah thiang lo," a ti.

Governor chuan, hmarchhak state-te chu ram dangte nena ramri inṭâwm an nih deuh vek avangin NEC-in an hmalakna hrang hrangah Ministry of External Affairs ráwn zela an thawhpui thiam a pawimawh thu a sawi a; NEC-a thawkte chu themthiam­na, faina leh zirna lamte ngaih pawimawh hmasaka nei turin a chah.

NEC hotute chuan, hmarchhak state pariat hnenah ṭanpuina sum emaw, scheme emaw an kalpuiin inthliarna an nei lo tih sawiin, mamawh dan azirin pek an nih ṭhin thu an sawi a; autono­mous district council area-te pawh NEC hnuai­ah direct-a ṭanpui an nih theih nan NEC Act tihdanglam tum mek a nih thu Governor hi an hrilh.

Governor ṭawiawm­tu, Shillong Mizoram House-a deputy resident commissioner Jacob Lalawmpuia chuan, Mizoram aṭanga damlo tam takin an pan ṭhin NEIGRIHMS bulah Mizoram House thar sak a ṭul thu leh, tuna Cleve Colony-a Mizoram House building chu sak ṭhat a ngaih thu meeting-ah hian a thlen a ni.