Dah ngheh phutin CSS Hindi Zirtirtute'n Theihtawp chhuah zel an tum
Mizoram CSS Hindi Teachers Association (MCHTA) hruaitute chuan, Mizoram sorkara dah ngheh an phût chungchangah theihpatawpin hma an la zel dawn tih an puang a, "Kan hlawhtlin hma chuan a tawp thlengin hma kan la zel dawn," an ti.
MCHTA hruaitute hian nimin khan Aizawl Press Club-ah thuthar thehdarhtute an kâwm a; Mizoram sorkara dah ngheh an phûtnaah sorkaer an nawr zel tur thu an sawi bakah, March 27, 2017 zana Chief Minister bangla tual an luhchilh chungchang an sawifiah a ni.
MCHTA vice president Lalchhuanliana chuan, chaw nghei zingah nikhaw hre loa tlu an awm en tura doctor kal tur an awm loh thu an hriat vang leh kar khat chhung chaw an nghei tawh chunga sorkar aṭanga tlawhtu an awm miah loin an rilru a tiná tih sawiin, "Kan CM, kar khat chhung ngawi renga min tlan pêltu hian kan awm dan hi hre ve rawh se, tiin CM banglaah kan chho ta a ni," a ti.
Lalchhuanliana chuan, CM banglaa an luhnaah tharum thawh tur leh buaina siam tum an ni lo a, bungrua tihchhiat an nei lo nia a sawi rualin, "Sorkar dan bawhchhiaa phalna nei loa CM chenna hmuna kan chho mai kha a pawi kan ti a, CM leh Zoram mipui lakah ngaihdam kan dil," a ti a; chutih rualin, an manganna leh harsatnate mipuiin an hriatthiampui an rin thu a sawi.
MCHTA Vice President chuan, an harsatnaah ṭanpui turin Mizoram Kohhran Hruaitu Committee (MKHC) an ngen a, anni'n palai hna thawh an remtih avangin lungawi lohna lantir an titawp lailâwk tih a sawi a, "Amaherawhchu, kan dikna chanvo nei ngei turin theihtawp kan chhuah zel dawn," a ti.
CSS Hindi zirtirtu pawl hruaitute chuan, Mizoram sorkarin CSS hnuaia Hindi zirtirtu a mamawh zat 1,305 lak Central sorkarah a dil a, a dil laiin, Plan period tawp hnu (kum 2017)-ah state mawhphurna a ni tih a hre chiang nia sawiin, "Chumi huám chuan Mizoram sorkarin appointment min pe a ni," an ti. Plan period a tawp tâkah chuan Central guidelines angin state plan-a luh chu an dikna chanvo niin an sawi.
MCHTA hruaitute sawi danin, Mizoram sorkarin plan period tawpah a mawhphurhna a ni tih a hriat avangin kum 2014-ah 14th. Finance Commission-ah CSS Hindi teacher mi 1,305-te dah ngheh (regularize)-na turin sum vbc. 5.98 a dil a ni. Hemi chungchang hi February 28, 2014-a chhuak Vanglaini chanchinbuah chhuah a nih thu an tarlang.
February 28, 2014-a chhuak Vanglaini-ah hian, Mizoram tlawhtu 14th. Finance Commission member-te hnenah Mizoram sorkarin department hrang hrang tan cheng vbc. 2035.57 a lo dil thu tarlan a ni. Sum dil zingah Education atan cheng vbc. 598.44 a tel thu tarlan a ni a, CSS Hindi teacher-te tan a nih leh nih loh erawh tarlan a ni lo.
MCHTA hruaitute sawi danin, October 6, 2013-ah Education department-in CSS Hindi zirtirtute state plan-a la lut turin proposal a lo kaltir tawh a (No. E.11011/2(B)/12-APMS/CSS/DTSE. Dated Aizawl, the 6th Oct, 2013); proposal-ah chuan hetiang hian a inziak - “After completion of the plan period i.e. 2016-17 the responsibility of maintenance of Hindi teachers will have to be borne by concerned state government,” tiin.
Proposal siam dan nia an sawi
2013-14 H/S teacher 97 & M/S teacher 229
2014-15 H/S teacher 97 & M/S teacher 229
2015-16 H/S teacher 97 & M/S teacher 229
2016-17 H/S teacher 98 & M/S teacher 229
Total H/S teacher 389 & M/S teacher 916
Grand total 1,305