KHAWTHLIR

VAT rgn. zat
Taxation department hnuaiah value added tax (VAT) registration nei mi 4,567 an awm a, chu'ng zinga 311 chu non-tribal an ni. VAT resgistration nei zingah hian district council hnuaia permanent trade license nei mi 45 leh temporary trade license nei mi 22 an awm.

Politics sawi
Union minister of state for Micro, Small & Medium Enterprises Giriraj Singh leh MNF president Zoramthangate chu April 2, 2017 tlai khan Raj Bhavan-ah an inkâwm a; Mizoram politics din­hmun leh Central politics-te an sawi dun.

Lungleiah 1,07,620
Mizoramah biometric enrolment leh Aadhaar card siam hna thawk mek zel a ni a, Lunglei DC pisa hnuaiah chuan nimin thleng khan Aadhaar card atan mi 1,07,620-in thla an la tawh a, hei hi district pumpuia mihring zat aṭangin 59.87% a ni.

Thisen pe
Mizoram police-a 5th. IR battalion-te chuan an battalion din champha vawi 9-na lawm nan nimin khan Aizawl Civil Hospital-ah thisen unit 73 an pe. Salvation Army India Eastern Territory kum 100 tlin lawm nan SAY Southern Division chuan nimin khan blood donation camp an huaihawt a, Lunglei Civil Hospital-ah mipa 29 leh hmei­chhia pariatte'n thisen unit 37 an pe.

Harhna thlen ni
Nimin khan Mizorama harhna thlen ni a ni a, Mizorama kohhran ṭhenkhatte'n an hmang. Presbyterian Kohhrana tualchhung kohhrante chuan nizan khan an hmang hlawm a, Harhna Ni pualin an inkhawm. Mizorama harhna thlen hmasa ber hun hi April 4, 1906-ah ngaih a ni.

Car chesualah thi
April 3, 2017 chhun dar 1:30 vel khan Khawbung leh Vaphai inkarah car chesualin, kawng thlangah metre 200 vel a lum a; car-a chuang zinga mi C Lalenglawma (56) h/o Lalremsangi, Dung­tlang, Vaphai Middle School-a headmaster chu damdawi-in thlenpui a nih hnuah a hliam tuar loin a thi.