Thli, rial leh ruah vangin in a chhe nual
April 2, 2017 aṭanga nimin zing lam thlenga Mizorama ruah sur, thli tleh leh rial tla vangin hmun hrang hrangah chenna in eng emaw zat a chhia a, lei minin in a tihchhiat a awm nual bawk.
Champhai district-a Chiahpui khuaah chuan Pathianni tlai dar 3-5 inkar vel khan thli tleh leh rial tlain chenna in 100 vel a tichhia a; Chiahpui khuaah hian in 180 vel awmin, a zatve aia tam a chhia a ni. In chhe zinga 40 chu luah zui tlak lohin a chhia niin an khaw V/C president Lalrinchhana chuan a sawi a; thliin in chung a lak zingah EFCI Kohhran sunday school hall te, khelmuala pavilion-te a tel.
Chiahpui khuaa in chhiate thawm ṭhat dan tur hi khawtlang hruaitute'n an ngaihtuah nghal a, hnatlangin an buaipui. Champhai DC Vanlalngaihsaka leh sorkar officer dangte'n chhawmdawl dantur an ngaihtuah bawk.
Kolasib distict-ah pawh khaw eng emaw zatah in tam tak a chhia. Vairengte IOC Vengah chenna in 30 vel a chhia a, thing tluin electric ban a delh chhe nual. South Chhimluangah in 20 a chhia a, chu'ng zinga in 10 chu luah tlak lohin a chhia a ni.
Kolasib Venglaiah in pathum a chhia a, New Diakkawnah Primary School-II chung rangva a phawk. Kolasib khawpui chhungah hian Thingdawla in chhia pathum nen a vaiin in 11 a chhia a ni. Saihapui-V leh Phainuamahte pawh in a chhe nual niin an sawi.
Kolasib DC pisaa thawkte'n an district chhunga in chhiate hi a hmunah an enfiah a; DC pisa chuan chhawmdawlna pek dan tur an ngaihtuah a ni.