Hna thawhnaa ṭha- hnemngai loah ngai
Chhimbial Chhantu leh PRISM Southern headquarters, Lunglei te chuan thuchhuah siamin, Mizoram chhim lama kawlphetha pekna tur kawng thar, Melriat to Khawiva via Buarpui line siam mekah hna thawh theih hun chhungin ṭhahnemngai takin hna an thawk loa an ngaih thu an tarlang.
Chhimbial Chhantu leh Lunglei PRISM-te chuan Melriat-Khawiva 132 KV line siam chungchangah sawi neuh neuh a tam avang leh hna thawh zawh hun a liam hnu pawha an la zawh loh avangin a hmunah an enfiah tih an sawi.
An thuchhuah chuan, hna thawh theih chhungin ṭhahnemngaihna a awm lo hlea an ngaih thu a tarlang a, "Khaw ro lai leh hna thawh hunlai pawhin tower phunna tura hmun ruahman sa vek tawhah measurement latu tur P&E department chuan measurement lak loh a ngah hle. Kan tlawh chin chhungah ngawt pawh location ṭhenkhat measurement lak mai theih tura laih zâwl vek tawh, measurement la lak loh hmun pakua lai tlawh a ni," a ti.
An thuchhuah tarlan danin, tower phunna turte chu a hmun laih zâwl (benching) ni tawh mah se, bisection fel taka ruahman hnuah chauh ban khur laih theih a nih avang leh P&E-in Measurement an lak loh avangin hna thawh theih a ni lo.
Tower bun hna thawh mekna an tlawhnaah, rawra an hmante chu a chhe hle niin an hria a, "Tower ban nghah chhan atan concrete slab chhûn hmasak awm loin, lei lâwngah tower ban tun nghal tawp a ni," an ti.
Hna thawhna hmun awmna khuaa V/C-te an kawmnaah, hna thawh dan chu a ṭha lo hlea an ngaih thu an lo hrilh hlawm tih an tarlang bawk.