Thingsai khuain hmarcha aṭangin Cheng nuai 100 chuang an la lut

Lunglei district-a Thingsai khua chuan, kum­in chhungin hmarcha quintal 400 chuang an hralh a, hei hi cheng nuai 100 chuang hret man vela chhût a ni.

Thingsai V/C president S Muanvela hnen aṭanga thu dawn danin, an khuain kuminah mumal taka quintal khat zela hmarcha hralh an chhinchhiah zat chu qtl. 392 a ni a, chu'ng bakah chuan quintal khat tling chiah loha hralh eng emaw zat a awm. Chhinchhiah leh chhin­chhiah lohte nen qtl. 400 chuang an hralh.

Thingsai hian hmarcha hi kum 2016-ah an ching a, kumin January thlaah an zût ṭan a, March thla chhungin an hralh zo. Quintal 10 thar tling chhungkaw pakua an awm a, chhungkaw tam zawk chuan qtl. 2-7 inkar an thar a ni.

Kumin hian kum dang aiin hmarcha man a ṭha a, a tìr lamah kg. khat Rs. 200-a hralh a ni. A hnu lamah mi tam zawk chuan kg. khat Rs. 250-260 in an hralh hlawm a, a vàn deuh hnuah kg. khat Rs. 300-a hralh a ni. Kg. khat hisápa hralh bakah, chheh tawp a, a leitute nena inbiakremna anga hralh eng emaw zat a awm bawk.

Thingsai VCP chuan, kawngpui ṭha nei se chuan an hmarcha hralhna rate pawh a sàn zawk a rin thu sawiin, "Kan khawtlangin hmarcha aṭangin sum la lut ṭha viau mah ila, sum vawn ṭhatna tur bank kan nei loh avangin harsatna kan tâwk a ni," a ti.