Oil lâkna kawng a ping rih ; Tuialhthei khuahkhirh a ni

Guwahati aṭanga tuialhthei phurh luhna kawngpui Meghalaya state chhunga Lumshnong-ah lei a min avangin Mizoram sorkar chuan tuialhthei hralh theih zat a khuahkhirh mek. Kawngpui chhia siamṭhat hun tur hriat a ni lo a, nimin tlai thleng khan lirthei lian kaltlang theih a la ni lo.

Food, Civil Supplies & Consumer Affairs (FCSCA) department chuan June 16, 2022 khan Mizoram puma hman turin petrol leh diesel khuah­khirhna a tichhuak a; Legal Metrology joint controller leh DCSO-te chu an bial chhungah dan loa tuialhthei zuarte khauh taka vil tura tih an ni.

FCSCA department chuan, Lumshnong-a kawngpui chhia avangin ni hnih/thum chhung vel tuialhthei lak luh a khaihlak palh thei tih a tarlang a; tuialhthei lak theih zat bithliahin, bûra tuialhthei lak tumte pe lo turin pump neitute a hriattir a ni.

Thu dawn danin, Lumshnong-a kawngpui chhia siam ṭhat a la ni lo a, maxi-cab tan pawisa chawiin mimal rama kawngah hêl theih a ni a, kawng a chhiat avangin car tê deuh tan tlan chi a ni lo thung. Lirthei lian tan kaltlang theih a ni lo bawk.